ފުޓްބޯޅަ އެސޯސިއޭޝަން އޮފް މޯލްޑިވްސްއަށް ފީފާއިން ދިން ފައިސާއަށް ހިޔާނާތްތެރިވި މައްސަލާގައި އަމިން ކޮންސްޓްރަކްޝަނުގެ ބައިވެރިވުން އޮތްކަމަށް ބަލައި އެކުންފުނީގެ މައްޗަށް ދައުވާކުރުމަށް ޕްރޮސެކިއުޓަރ ޖެނެރަލްގެ އޮފީހުން ނިންމައިފިއެވެ.

އެފްއޭއެމްގެ ހިޔާނާތުގެ މައްސަލާގައި ޕީޖީން ވަނީ އަމިން ކޮންސްޓްރަކްޝަނުގެ މައްޗަށް ދައުވާކުރުމަށް ނިންމައި، އެއް މިލިއަން ޑޮލަރު ނަގައިދިނުމަށް އެދިފައެވެ. މި މައްސަލާގައި ޕީޖީއޮފީހުން ވަނީ، ބައްސާމާއި އިތުރު ދެ މީހަކާއި އަދި އަމިން ކޮންސްޓްރަކްޝަނުގެ މައްޗަށް ދައުވާކުރުމަށް އާދިއްތަދުވަހު ކްރިމިނަލް ކޯޓަށް ފޮނުވާފައެވެ.

އަމިން ކޮންސްޓްރަކްޝަނުގެ މައްޗަށް އުފުލަނީ މަނީލޯންޑަރކުރުމުގައި ބައިވެރިވުމާއި، ޓެރަރިޒަމަށް ފައިނޭންސް ކުރުމުގެ ކުށުގެ ދައުވާއެވެ. މި މައްސަލާގައި އަމިން ކޮންސްޓްރަކްޝަނުގެ މައްޗަށް ދައުވާކުރަނީ، އަމިން އެވެނިއުއިން އެޕާޓްމަންޓެއްގަތުމަށް ބައްސާމް ދިން ފައިސާއަކީ، ފީފާއިން އެފްއޭއެމަށްދިން ފައިސާކަން އެނގިހުރެވެސް އެ ބަލައިގަތުމެވެ. އެ މުއާމަލާތުގައި އެޕާޓްމަންޓް ގަތުމަށް ބައްސާމް ދީފައިވަނީ އެފްއޭއެމްގެ ޗެކެކެވެ.

Advertisement

ޕީޖީ އޮފީހުން ބުނީ އަމީން އެވެނިއު އެޕަރޓްމަންޓް ގަތުމަށް އެފް.އޭ.އެމްގެ އެކައުންޓުގައިވާ ފައިސާއިން އަމީން ކޮންސްޓްރަކްޝަނަށް ފައިސާ ދެއްކުމަށްޓަކައި، ޗެކު ތައްޔާރުކޮށްދީ، 14 އޭޕްރީލް 2021 ދުވަހު އެ ޗެކު މެދުވެރިކޮށް އަމީން ކޮންސްޓްރަކްޝަނަށް އެއް ޖަމާކުރުމުން، އެ ފައިސާއަކީ ޑޮލަރު ވިއްކުމުގެ މުޢާމަލާތެއްކަމުގައި ދެއްކުމުގެ ގޮތުން އެ ޑޮލަރަށްވާ ދިވެހި ރުފިޔާ އެފް.އޭ.އެމްއަށް ލިބިފައިނުވަނީސް، އަމީން ކޮންސްޓްރަކްޝަނުން އެފް.އޭ.އެމްއަށް، 15.4 މިލިއަން ރުފިޔާ ލިބުނުކަމަށް ސްޓޭމްޕް ޖަހައި ސޮއިކޮށް އެކަމުގެ ލިޔުން ތައްޔާރުކޮށްފައިވާކަމަށެވެ.