ރ.އަތޮޅުގެ ވެރިކަންކުރާރަށް ކަމަށްވާ، އުގޫފާރުން އައިޑީކާޑާއި ޕާސްޕޯޓް ދޫކުރުމުގެ ހިދުމަތް މިރޭ ރަސްމީކޮށް ފައްޓަވައިފިއެވެ.

އުނގޫފާރުން އައިޑީކާޑާއި ޕާސްޕޯޓް ދޫކުރަން ރަސްމީކޮށް ފަށާފައިވަނީ، ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިހާރު ރ.އަތޮޅުގެ ބައެއް ރަށްތަކަށް ކުރައްވަމުންގެންދަވާ ޒިޔާރަތުގައި މިރޭ އުނގޫފާރުގައި ބޭއްވި ޖަލްސާގެ ތެރެއިންނެވެ. އުނގޫފާރުން އައިޑީކާޑާއި ޕާސްޕޯޓް ދޫކުރަން ރަސްމީކޮށް ފައްޓަވައިދެއްވީ ދާހިލީ ވަޒީރު އަލީ އިހްސާން އާއި ރ. ކައުންސިލުގެ ރައީސް ހުސެއިން ނާސިފެވެ.

ރ.އަތޮޅަކީ ރާއްޖޭގެ އާބާދީގެ ނިސްބަތުން އެންމެ މީހުންގިނަ އެއް އަތޮޅެވެ. އުނގޫފާރަކީ އަތޮޅުގެ ވެރިކަންކުރާ ރަށުގެ އިތުރުން އެއް ރަށަކުން ގިނަ ހިދުމަތްލިބޭ ރަށަކަށްވުމުން ރ.އަތޮޅުގެ ވަރަށްގިނަ މީހުން ކޮންމެ ދުވަހަކުވެސް އުނގޫފާރަށް ދަތުރުކުރެއެވެ. އެންމެގިނަ މީހުން އުނގޫފާރަށް ދަތުރުކުރަނީ ސިއްހީ ހިދުމަތް ހޯދުމަށެވެ. 

އުނގޫފާރުން ޕާސްޕޯޓް ދޫކުރަން ފެށުމާ ގުޅޭގޮތުން މޯލްޑިވްސް އިމިގްރޭޝަނުން މިރޭ ބުނެފައިވަނީ، މާދަމާއިން ފެށިގެން "އިމުގާ" މެދުވެރިކޮށް ހުށަހަޅާ ޕާސްޕޯޓުތައް ރ.އުނގޫފާރުން ނެގުމުގެ އިންތިޒާމް ހަމަޖެހިފައިވާ ކަމަށެވެ.

ރ.އަތޮޅު އުނގޫފާރުން އައިޑީކާޑާއި ޕާސްޕޯޓް ދޫކުރަން ފަށާފައިވާއިރު، އެރަށަކީ އާބަން ސެންޓަރެއްގެ ގޮތުގައި މި ސަރުކާރުން ތަރައްޤީކުރުމަށް ނިންމާފައިވާ ރަށެކެވެ.