މާކެޓިން ފާމެއްކަމަށްވާ ދަ ޓްރެވަލް ގައިޒްއިން އިންތިޒާމްކޮށްގެން ބޭއްވުމަށް ތައްޔާރުވަމުންދާ "ރަށު އެކްސްޕޯ" ގެ ޓައިޓަލް ޕާޓްނަރަކަށް ދިރާގް ހަމަޖައްސައިފިއެވެ.

ޓައިޓަލް ޕާޓްނަރަކަށް ދިރާގް ހަމަޖެއްސުމުގެ އެއްބަސްވުމުގައި ރަށު އެކްސްޕޯ އިންތިޒާމުކުރާ ފަރާތުގެ ހައިސިއްޔަތުން ސޮއިކުރެއްވީ، ޓްރެވަލް ގައިޒްގެ ޑިރެކްޓަރު ޑރ.ހުސައިން ސަނީ އުމަރެވެ. އަދި ދިރާގްގެ ފަރާތުން އެއްބަސްވުމުގައި ސޮއިކުރެއްވީ، ދިރާގްގެ ޑިރެކްޓަރ ބްރޭންޑް އެންޑް މާކެޓިން ކޮމިޔުނިކޭޝަންސް މުހައްމަދު މިރުޝާން އެވެ. 

މިކަމާ ގުޅޭގޮތުން ދަ ޓްރެވަލް ގައިޒްއިން ބުނީ ރާއްޖޭގައި ފުރަތަމަ ފަހަރަށް ބާއްވާ ރަށު އެކްސްޕޯގެ ޓައިޓަލް ޕާޓްނަރެއްގެ ހައިސިއްޔަތުން ރާއްޖޭގެ އެންމެބޮޑު ޓެލެކޮމް ކުންފުނި ހަމަޖެހިެގން ދިއުމަކީ މިފަދަ އިވެންޓްތަކަށާއި ރާއްޖޭގެ ލޯކަލް ޓޫރިޒަމް ކުރިއެރުވުމަށް ދިރާގުން ދޭ އަހަމިއްޔަތުކަން ހާމަވާކަމެއްކަމަށެވެ. އަދި މި އިވެންޓްގެ ޕާތްނަރަކަށް ދިރާގް ވެގެންދިއުމަކިީ ރަށު އެކްސްޕޯގެ ބައިވެރިންނަށް ޓެކްނޮލޮޖީއާއި އެނޫންވެސް ގޮތްގޮތުން ކުރިއެރުމަށް މަގުފަހިވެގެންދާނޭ ކަމެއްކަމަށެވެ.

އެއްބަސްވުމާ ގުޅޭގޮތުން ޑރ.ހުސައިން ސަނީ ވިދާޅުވީ ރަށު އެކްސްޕޯގައި ދިރާގް ފަދަ ކުންފުންޏެއްގެ ބައިވެރިވުން ލިބިގެންދިއުމަކީ އެކްސްޕޯއަށް ލިބިގެންދާނޭ އިތުރު ކުރިއެރުމެއް ކަމަށެވެ. އަދި މިއީ ލޯކަލް ކުންފުނިތައް މި ދާއިރާއިން ކުރިއެރުވުމަށް ދިރާގުން އިސްކަންދޭކަމުގެ ހެތްކެއްކަމަށްވެސް ސަނީ ފާހަގަކުރެއްވިއެވެ.

މިރުޝާން ވިދާޅުވީ ރައްޔިތުންނާ ގުޅޭ މިފަދަ އެކްސްޕޯއެއްގައި ދިރާގަށް ބައިވެރިވުމުގެ ފުރުސަތު ލިބިގެންދިއުމަކީ އެކުންފުންޏަށް ލިބިގެންދާ ފަހުރެއްކަމަށާއި، މިއީ ވިޔަފާރިތަކާ އާއްމުން ގުޅުވާލަދޭނެ މުހިއްމު އެކްސްޕޯއަކަށް ވެގެންދާނޭކަމަށެވެ.

"ރަށު އެކްސްޕޯ 2025" ބޭއްވުމަށް ހަމަޖެހިފައިވަނީ، އަންނަ ފެބުރުއަރީމަހުގެ 13 އިން 15 އަށް ހުޅުމާލޭ ސެންޓްރަލް ޕާކްގައެވެ. ރަށު އެކްސްޕޯއަކީ ދިވެހިރާއްޖޭގެ ރަށްތަކުގެ ރީތިކަމާއި ސަގާފަތާއި އެކިއެކި ހަރަކާތްތައް ދައްކުވައިދޭގޮތަށް ރާއްޖޭގައި ފުރަތަމަ ފަހަރަށް އިންތިޒާމުކުރާ މިބާވަތުގެ ފުރަތަމަ އެކްސްޕޯއެވެ.

"ރަށު އެކްސްޕޯ 2025"ގެ އިތުރު ޕާޓްނަރުންގެ ތެރޭގައި ޓޫރިޒަމް މިނިސްޓްރީ، މޯލްޑިވްސް މާކެޓީން ޕީއާރު ކޯޕަރޭޝަން، ފާހަގަކޮށްލެވެއެވެ. މި އެކްސްޕޯގެ މީޑިއާ ޕާޓްނަރަކީ ވޮއިސް އެވެ.