ތައިލެންޑްގައި ބަންދުކޮށްފައި ތިބި ޗައިނާގެ އުއިގަރ ދަރިކޮޅަށް ނިސްބަތްވާ މުސްލިމުން އަނބުރާ ޗައިނާއަށް ނުފޮނުވުމަށް އދގެ އިންސާނީ ހައްގުތަކާ ބެހޭ އެކްސްޕަރޓުން އެދިވަޑައިގެންފިއެވެ.

މިއީ 2014 ވަނަ އަހަރު، ޗައިނާ ސަރުކާރުގެ އަނިޔާވެރިކަމުން ސަލާމަތްވުމަށް، ފިލައިގެން އައިސް ގަވާއިދާ ޚިލާފަށް ތައިލެންޑަށް އެތެރެވި އުއިގަރ މުސްލިމުންގެ ތެރެއިން ބައެކެވެ. އޭރު ހައްޔަރުކުރި މީހުންގެ ތެރެއިން 100 އެއްހާ މީހުން ޖެހިގެން އައި 2015 ވަނަ އަހަރުގެ ޖުލައި މަހު ތައިލެންޑުން ޗައިނާއަށް ޑީޕޯޓްކުރިއެވެ. އެއާއެކު ބައިނަލްއަގްވާމީ މުޖްތަމައުގެ ނުރުހުން ތައިލެންޑަށް އަމާޒުވެ، ބާކީ ތިބި މީހުން ފޮނުވާލުން މަޑުޖައްސާލިއެވެ. އަނބުރާ ޗައިނާއަށް ފޮނުވި މީހުންނަށްވީ ގޮތެއް ފަހުން ނޭނގެއެވެ. އިންސާނީ ހައްގުތަކަށް މަސައްކަތްކުރާ ޖަމްއިއްޔާތަކުން ބުނީ ޗައިނާގެ ސަރުކާރަށް ފިލައިގެން އައި ބަޔަކު އަނބުރާ ފޮނުވާލުމުން އެމީހުންގެ ރައްކާތެރިކަމާމެދު ސުވާލު އުފެދެއެވެ.

ޗައިނާގެ ބައިމަދު އުއިގަރ މުސްލިމުންނާ ދެކޮޅަށް އެގައުމުގެ ސަރުކާރުން ނިޒާމީ ގޮތެއްގައި އަނިޔާކޮށް، އަޅުވެތިކުރަމުންދާކަމަށް އިންސާނީ ހައްގުތަކަށް މަސައްކަތްކުރާ ބައިނަލްއަގްވާމީ ޖައިއްޔާތަކުންނާއި ގައުމުތަކުން އަންނަނީ ތުހުމަތުކުރަމުންނެވެ.

ތައިލެންޑްގައި ތިބި އުއިގަރ މުސްލިމުން ފޮނުވާލުމުގެ އަޑުފެތުރުނުނަމަވެސް، ތައިލެންޑުން ވަނީ އެފަދަ ފިޔަވަޅެއް އަޅަން ނޫޅޭކަމަށް ބުނެފައެވެ. އދގެ ރެފިއުޖީންނާ ބެހޭ އެޖެންސީއިންވެސް ވަނީ އެމީހުން އަނބުރާ ފޮނުވާލަން ނޫޅޭކަމުގެ ޔަގީންކަން ތައިލެންޑް ސަރުކާރުން ހޯދާފައެވެ. އަދި އެމެރިކާގެ ޚާރިޖީ ވަޒީރުކަމާ އަލަށް ހަވާލުވެވަޑައިގަތް މާކޯ ރޫބިއޯވެސް ވަނީ ތައިލެންޑްގައި ތިބި އުއިގަރ މުސްލިމުން އަނބުރާ ނުފޮނުވުމަށް އެގައުމުގެ ސަރުކާރުގައި ދަންނަވާނެކަމަށް ވިދާޅުވެފައެވެ.