ފްރުޓް ޓްރީ ފިހާރައިގެ ގުދަނުގައި ހިނގި އަލިފާނުގެ ހާދިސާއާ ގުޅިގެން 14 ދިވެހީންނާއި 19 ބިދޭސީންނަށް ވަގުތީ ބޯހިޔާވަހިކަން ފޯރުކޮށްދީފިއެވެ.

މިއަދު ފަތިހު ފުރުޓް ޓްރީ ފިހާރައިގެ ގުދަނުގައި ރޯވި ކަމުގެ މައުލޫމާތު އެމްޑީއެފަށް ލިބުނީ 04:20 ހާއިރު ކަމަށާއި އަލިފާންގަނޑު އެއްކޮށް ނިއްވާލާފައިވަނީ 06:00 ހާއިރު ކަމަށް ސިފައިން ބުނެފައިވެއެވެ.

ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން އެކސްގައި ކުރި ޕޯސްޓެއްގައި ބުނީ، ފްރުޓް ޓްރީ ފިހާރައިގެ ގުދަނުގައި ހިނގި އަލިފާނުގެ ހާދިސާއާ ގުޅިގެން އެ އޮތޯރިޓީގެ ޓީމުތަކުން އެ ސަރަހައްދުގައި ހަރަކާތްތެރިވެ، އިންސާނީ އެހީ ފޯރުކޮށްދޭންޖެހޭ ގޭބީސީތައް ހުރިތޯ ކަށަވަރުކުރުމުގެ މަސައްކަތް ކުރަމުންދާ ކަމަށެވެ.

Advertisement

އަލިފާނުގެ ހާދިސާގައި ދުމުގެ ސަބަބުންނާއި އިމާރާތްތަކަށް ލިބުނު ގެއްލުންތަކުގެ ސަބަބުން ވަގުތީ ބޯހިޔާވަހިކަން ބޭނުންވާ 10 ގޭބީސީއެއްގެ 33 ފަރާތެއް (14 ދިވެހިންނާއި 19 ބިދޭސީން) ފާހަގަކުރެވުނު ކަމަށް އެންޑީއެމްއޭ އިން ބުންޏެވެ.

މީގެ ތެރެއިން 5 ގޭބިސީއެއްގެ 14 ދިވެހިންނާއި 8 ބިދޭސީންނަށް ވަގުތީ ބޯހިޔާވަހިކަމާއި ކެއިންބުއިން ހަމަޖައްސައިދެމުންދާ ކަމަށް އެންޑީއެމްއޭ އިން ހާމަކުރިއެވެ.

އަދި ބިދޭސީ އެއް ޢާއިލާ ވަނީ އަމިއްލަ ވަގުތީ ބޯހިޔާވަހިކަމަކަށް ބަދަލުވެފައި ކަމަށާ 11 ބިދޭސީންނަށް އެ މީހުން ނިސްބަތްވާ ކުންފުނިތަކުން ވަނީ އެހީތެރިކަން ފޯރުކޮށްދީފައިވާ ކަމަށެވެ.