ޑިއުޓީ ވަގުތު ޑިއުޓީގެ ކަންކަމުގައި މެނުވީ ފޯނު ބޭނުން ނުކުރުމަށް ދިވެހި ފުލުހުންގެ ކިބައިން ކޮމިޝަނަރ އޮފް ޕޮލިސް އަލީ ޝުޖާޢު އެދިވަޑައިގެންފިއެވެ.

ފުލުހުންގެ 38 ވަނަ އަސާސީ ތަމްރީން ކޯހުގެ ދަސްވެނިވުމުގެ ރަސްމިއްޔާތުގައި ސީޕީ ޝުޖާޢު ވިދާޅުވީ ފުލުހުންނާ ގުޅިގެން ރައްޔިތުން ކުރާ އެއް ޝަކުވާއަކީ ފުލުހުން މަގުމަތިން ފެނުނު ނަމަވެސް މަގުމަތީގައި ހިނގާ ކަންކަމަށް ނުބަލައި ފޯނާ ކުޅެން ތިބޭ ކަމުގެ ޝަކުވާ ކަމަށެވެ.

މިއާއެކު ސީޕީ ވަނީ ރައްޔިތުންނާ މުޢާމަލާތް ކުރާއިރު، އަބަދުވެސް ރިވެތި ބަހުން މުޢާމަލާތް ކުރުމަށް ފުލުހުންނަށް އިލްތިމާސް ކުރައްވާފައެވެ. އެގޮތުން، ރައްޔިތުންނާ ރިވެތި ބަހުން މުޢާމަލާތް ނުކުރެވޭނެ ވަގުތެއް އައިސްގެން ނުވާނެ ކަމަށާ، އެންމެ ރިވެތި ބަހުން ވާހަކަ ދައްކަން ޖެހޭނީ ރައްޔިތުންނާ ކަމަށް ސީޕީ ވިދާޅުވިއެވެ.

މީގެ އިތުރުން ފުލުހުންނަށް ލިބޭ ޤާނޫނީ ބާރުތައް ޒިންމާދާރުކަމާއެކު ބޭނުންކުރުމަށްވެސް ސީޕީ އެދިވަޑައިގެންނެވިއެވެ.

ސީޕީ ވިދާޅުވީ ފުލުހުންގެ ޚިދުމަތުގެ ފެންވަރު ރަނގަޅުކޮށް ޚިދުމަތް ފުޅާކުރުމަށް ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން، ފުލުހުންނަށް ބޭނުންވާ ތަމްރީނުތައް ރާއްޖެއާއި ރާއްޖޭން ބޭރުން ފޯރުކޮށްދިނުމާއި ރަށްރަށުގައި ފުލުހުންގެ މަރުކަޒުތައް ޤާއިމުކުރުމުގެ މަސައްކަތް ކުރަމުންދާކަން ފާހަގަކުރެއްވިއެވެ.