އިންޓަނެޓް ބޭންކިން މެދުވެރިކޮށް ފަސޭހަކަމާ އެކު ބޭރު ފައިސާ މާރުކުރެވޭނެ ޕޯޓަލެއް ބޭންކް އޮފް މޯލްޑިވްސް (ބީއެމްއެލް) އިން މިއަދު ތައާރަފްކޮށްފި އެވެ.

ބީއެމްއެލް އިން ބުނީ އިންޓަނެޓު ބޭންކިން މެދުވެރިކޮށް ރިސޯޓުތަކާއި ހޮޓާތައް އަދި ގެސްޓްހައުސްތަކާއި ފަތުރުވެރިކަމުގެ ދާއިރާއާ ގުޅުން ހުރި ވިޔަފާރިތަކަށް މި ޕޯޓަލް މެދުވެރިކޮށް ބޭރު ފައިސާ މާރު ކުރެވޭނެ ކަމަށެވެ. އަދި ހިދުމަތަކީ ފޮރިން ކަރަންސީ އެކްޓް އަދި އެމްއެމްއޭގެ ކަރަންސީ ރެގިއުލޭޝަން އާ އެއްގޮތްވާ ގޮތުގެ މަތިން ފެށި ޚިދުމަތެއް ކަމަށެވެ. 

މީގެ އިތުރުން، މި ޕްލެޓްފޯމްގެ ޒަރީއާއިން ވިޔަފާރިތަކަށް ގާނޫނާއި ގަވައިދުގެ ދަށުން މާރުކުރަން ޖެހޭ ( މެންޑޭޓަރީ އެކްސްޗޭންޖް) ހުރިހާ މުއާމަލާތެއް ފަސޭހަކަމާއެކު ޓްރެކްކޮށް ރިވިއު ކުރުމަށް އެކްޓިވިޓީ ރިޕޯޓުން ފެންނާނެ ކަމަށްވެސް އެ ބޭންކުން ބުންޏެވެ.

މި ޕްލެޓްފޯމު މެދުވެރިކޮށް ބޭންކަށް ޑޮލަރު މާރުކުރާނީ ( ބޭންކުން ޑޮލަރު ގަތުން) 15.42 ރުފިޔާ އަށެވެ. މިއީ ބޭންކުން ޑޮލަރު ވިއްކާ އަގެވެ.

މި އޮންލައިން ޕްލެޓްފޯމް ގާއިމުކުރުމުގެ މަގުސަދަކީ ފަތުރުވެރިކަމުގެ ދާއިރާގެ ވިޔަފާރިތަކަށް ލާޒިމްކޮށްފައިވާ ބޭރު ފައިސާ މާރުކުރުމަށް މަގުފަހިކޮށްދީ، ވީހާވެސް ފަސޭހަކަމާއެކު މި ހިދުމަތް ލިބޭނެ ގޮތް ހެދުން ކަމަށް ބީއެމްއެލް އިން ބުނެފައި ވެއެވެ. 

ޓޫރިޒަމް ހިދުމަތްދޭ ފަރާތްތަކުން ބޭރު ފައިސާއާ ބެހޭ ގަވާއިދުގެ ދަށުން ފުރަތަމަ ފަހަރަށް 30 މިލިއަން ޑޮލަރު (463 މިލިއަން ރުފިޔާ) އާއި 40 މިލިއަން ޑޮލަރު (617 މިލިއަން ރުފިޔާ) އާ ދެމެދުގެ އަދަދެއް ބޭންކުތަކަށް މާރުކުރާނެ ކަމަށް ބެލެވޭ ކަމަށް މަރުކަޒީ ބޭންކު، އެމްއެމްއޭ އިން ވަނީ ބުނެފައެވެ.