ސީރިއާގެ ރައީސް، ބައްޝާރު އަލް އަސަދުގެ ވެރިކަން ވެއްޓުމާއިއެކު މީގެ ކުރިން ޔޫރަޕިއަން ޔޫނިއަން (އީޔޫ) އިން ސީރިއާއަށް އަޅާފައިވާ ދަތިކުރުމުގެ ފިޔަވަޅުތައް ބައެއް ފިޔަވަޅުތައް އުވާލަން ނިންމައިފިއެވެ.

ސީރިއާއަށް ދަތިކުރުމުގެ ފިޔަވަޅުތަކެއް އެޅުމަށް އދ އާއި އީޔޫ އިން ނިންމާފައިވަނީ 2011 ވަނަ އަހަރުއެވެ.

ފްރާންސްގެ ފޮރިން މިނިސްޓަރު، ޖީން ނޮއެލް ބެރޮޓް ވިދާޅުވީ، އެގައުމުގެ ހަކަތަ އާއި ދަތުރުފަތުރާއި، މާލީ ފަރާތްތަކާއި މެދު އަޅާފައިވާ ފިޔަވަޅުތައް އުވާލަން ނިންމާފައިވާކަމަށެވެ.މިއީ ސީރިއާއަށް ކުރިމަތިވެފައިވާ އިގްތިޞާދީ ހާލަތުން އަރައިގަތުމަށް ނިންމި ނިންމުމެއްކަމަށް އެފަރާތުން ބުނެއެވެ.

Advertisement

މިއާއިއެކު ފްރާންސްގެ ޚާރިޖީ ވަޒީރު ވަނީ، އީރާނުގައި އެގައުމުގެ ރައްޔިތުންތަކެއް ހައްޔަރުކުރުމާއި ގުޅިގެން އީރާނަށް ދަތިކުރުމުގެ ފިޔަވަޅު އަޅާނެކަމުގެ އިންޒާރު ދީފައެވެ.

މިދިޔަ އަހަރިގެ ޑިސެންބަރު މަހުގެ 8 ވަނަ ދުވަހު އަސަދުގެ ވެރިކަން ވެއްޓުމުން އޭނާ ގައުމު ދޫކޮށް ފިލާވަޑައިގެންފައިވާއިރު، އޭނާ ހައްޔަރުކުރުމަށް ފްރާންސުން އަމުރެއް ވެސް ވަނީ ނެރެފައެވެ.