ރާއްޖޭގެ އެންމެ ބޮޑު ގެސްޓްހައުސް އަދި ޑޮމެސްޓިކް ޓޫރިޒަމް އެކްސްޕޯ ކަމުގައިވާ ރަށު އެކްސްޕޯ 2025ގެ ރަސްމީ ބްރޯޑްކާސްޓިންގ ޕާޓްނަރަކަށް ޕަބްލިކް ސަރވިސް މީޑިއާ (ޕީއެސްއެމް) ހަމަޖެހިއްޖެއެވެ.

މި އެކްސްޕޯ އިންތިޒާމްކުރާ ޓްރެވަލް ގައިޒްއިން މިކަން އިއުލާނުކޮށްފައިވަނީ މިއަދުއެވެ.

2025 ވަނަ އަހަރުގެ ފެބްރުއަރީ 13 އިން 15 އަށް ބޭއްވުމަށް ހަމަޖެހިފައިވާ ރަށު އެކްސްޕޯ 2025 އަކީ ރާއްޖޭގެ ގެސްޓްހައުސް ވިޔަފާރި އަދި ޑޮމެސްޓިކް ޓޫރިޒަމް ކުރިއެރުވުމަށް ބާއްވާ މުހިންމު އިވެންޓެކެވެ. ޕީއެސްއެމް ބްރޯޑްކާސްޓިންގ ޕާޓްނަރަކަށް ވުމާއެކު، މި އިވެންޓުގެ މަޢުލޫމާތު ރާއްޖެއާއި ދުނިޔޭގެ އެކި ކަންކޮޅުތަކަށް ފޯރުކޮށްދިނުމުގެ ފުރުސަތު ލިބިގެންދާނެއެވެ.

Advertisement

ޓްރެވެލް ގައިޒް އިން ފާހަގަކޮށްފައިވާ ގޮތުގައި، ޕީއެސްއެމްއިން ރަށު އެކްސްޕޯ 2025ގެ ތަފްސީލީ ކަވަރޭޖް ފޯރުކޮށްދޭނެއެވެ. މީގެ ތެރޭގައި ލައިވް އަޕްޑޭޓްތަކާއި، އިންޑަސްޓްރީގެ އިސްވެރިންނާއެކު ކުރާ އިންޓަވިއުތަކާއި، ޚާއްސަ ޕްރޮގްރާމްތައް ހިމެނެއެވެ.

މި ޕާޓްނަރޝިޕްގެ ސަބަބުން އެކްސްޕޯގެ މުހިންމު ކަންތައްތަކާއި، ވިޔަފާރީގެ ފުރުސަތުތަކާއި، ދިވެހިންގެ ސަގާފަތް ރާއްޖެއާއި ރާއްޖެއިން ބޭރަށް ހިއްސާކުރެވި، ރާއްޖޭގެ ޓޫރިޒަމް ދާއިރާ އިތުރަށް ވަރުގަދަވެގެންދާނެ ކަމަށް ބުނެފައިވެއެވެ.

"ރަށު އެކްސްޕޯ 2025ގެ ރަސްމީ ބްރޯޑްކާސްޓިންގ ޕާޓްނަރަކަށް ޕަބްލިކް ސަރވިސް މީޑިއާ ވުމާ ގުޅިގެން އަޅުގަނޑުމެން ވަރަށް އުފާކުރަން. ޕީއެސްއެމްގެ ފުޅާ ދާއިރާއެއްގައި މީޑިއާ ފޯރުކޮށްދިނުމުގެ ގާބިލްކަމާއި ފެންވަރު ރަނގަޅު ކޮންޓެންޓް އުފެއްދުމުގެ ޤާބިލްކަމަކީ ރަށު އެކްސްޕޯގެ ވާހަކަތައް ދުނިޔެއަށް ގެނެސްދިނުމަށް އެންމެ އެކަށީގެންވާ ޕާޓްނަރަކަށް ވުމަށް މަގުފަހިކޮށްދޭ ކަންކަމެވެ." ޓްރެވަލް ގައިޒްގެ ޑިރެކްޓަރ ޑރ. ހުސައިން ސަނީ އުމަރު ވިދާޅުވިއެވެ. 

ޕީއެސްއެމްގެ މެނޭޖިންގ ޑިރެކްޓަރ އިބްރާހިމް ނަސްރީން ވަނީ ރަށު އެކްސްޕޯ 2025ގެ މުހިންމުކަން ފާހަގަކުރުމަށް ޓްރެވަލް ގައިޒްއާއެކު މަސައްކަތްކުރުމަށް ލިބުނު ފުރުސަތާމެދު އުފާކުރާކަން ފާހަގަކުރައްވާފައެވެ.

”ޕީއެސްއެމްއިން ގެސްޓްހައުސް އިންޑަސްޓްރީގެ އިޤްތިޞާދީ އަދި ސަގާފީ ހިއްސާ ފާހަގަކުރުމަށް ގިނަގުނަ މަސައްކަތްތަކެއް ކުރަމުންދާއިރު، މި ޕާޓްނަރޝިޕްއަކީ ޑޮމެސްޓިކް ޓޫރިޒަމްގެ ކުރިއެރުމަށް އަޅުގަނޑުމެން ދޭ އަހައްމިއްޔަތުކަން ދައްކުވައިދޭ ކަމެއް.“ ޕީއެސްއެމްގެ މެނޭޖިންގ ޑިރެކްޓަރ އިބްރާހިމް ނަސްރީން ވިދާޅުވިއެވެ. 

ޓްރެވެލް ގައިޒް އިން މައުލޫމާތު ދިން ގޮތުގައި، ރަށު އެކްސްޕޯ 2025ގައި ގެސްޓްހައުސްތަކަށް ޚާއްޞަ ހޯލެއް ހުންނާނެއެވެ. މި ހޯލުގައި ގެސްޓްހައުސްތަކަށް އެމީހުންގެ ޚިދުމަތްތައް ދެއްކުމާއި، ސީދާ ޒިޔާރަތްކުރާ ފަރާތްތަކަށް ޕެކޭޖްތައް ވިއްކުމާއި، ވިޔަފާރީގެ މުހިންމު ގުޅުންތައް ޤާއިމުކުރުމުގެ ފުރުސަތު ލިބިގެންދާނެއެވެ.

ރަށު އެކްސްޕޯ 2025އާ ބެހޭ އިތުރު މަޢުލޫމާތު ހޯދުމަށް 7453868 ނަންބަރުން ހާއިމް އިބްރާހީމާ ގުޅުމަށް އެދިފައިވެއެވެ.

ޓްރެވަލް ގައިޒްއަކީ ރާއްޖޭގެ އިސް މާކެޓިންގ އަދި ޕީއާރު ކުންފުންޏެކެވެ. މި ކުންފުނިން ރާއްޖޭގެ މަންޒިލުތަކުގެ ޚާއްޞަކަން ފާހަގަކޮށް، އަސްލު ތަޖުރިބާތަކާ ގުޅުވައިދީ، ޓޫރިޒަމް ދާއިރާ ކުރިއެރުވުމަށް މަސައްކަތްކުރެއެވެ.