ބޭންކް އޮފް މޯލްޑިވްސްއަށް ނިމިގެންދިޔަ 2024 ވަނަ އަހަރު ސާފްދައިދާގެ ގޮތުގައި 2.1 ބިލިއަން ރުފިޔާ ލިބިފައިވާކަމަށް އެ ބޭންކުން ހާމަކޮށްފިއެވެ.

ބީއެމްއެލްގެ ނިމިގެންދިޔަ ކުއާޓަރުގެ މާލީބަޔާން އާއްމުކުރަމުން އެ ބޭންކުން ނެރުނު ބަޔާނެއްގައި ބުނެފައިވަނީ، އޮޑިޓް ނުކުރާ ހިސާބުތަކުން ދައްކާގޮތުގައި މިދިޔަ އަހަރު މުޅި ބޭންކުގެ ސާފްފައިދާ 2.1 ބިލިއަން ރުފިޔާއަށް އަރާފައިވާކަމަށެވެ. މިއީ އޭގެކުރީ އަހަރާ އަޅާބަލާއިރު، 4 އިންސައްތަ އިތުރުވުމެކެވެ. މިދިޔަ އަހަރު ސާފްފައިދާ ރެކޯޑް އަދަދަކަށް އިތތުރުވުމުގެ މައިގަނޑު ސަބަބެއްކަމަށް ބީއެމްއެލުން ފާހަގަކޮށްފައިވަނީ ޕްރޮވިޝަންގެ ގޮތުގައި ބެހެއްޓިފައިވާ ނިސްބަތުން ބޮޑު އަދަދެއް ލިބުމެވެ.

ބީއެމްއެލުން ބުނީ މިދިޔަ އަހަރު ކުންފުނީގެ އެސެޓް 3 ބިލިއަން ރުފިޔާއަށް އިތުރުވެގެންދިޔައިރު، އުފެއްދުންތެރި ލޯނުގެ އަދަދު އިތުރުވެ، ވިޔަފާރިތަކަށް 5.2 ބިލިއަން ރުފިޔާގެ ލޯނު ދޫކުރެވިފައިވާކަމަށެވެ. 

ނިމިގެންދިޔަ ކުއާޓަރުގެ މާލީބަޔާނަށް ބަލާއިރު، މިދިޔަ އަހަރުގެ އެންމެ ފަހު 3 މަސްދުވަހު ބީއެމްއެލް ހިންގުމުގެ ފައިދާގެ ގޮތުގައި 685 މިލިއަން ރުފިޔާ ވަނީ ލިބިފައެވެ. މި ކުއާޓަރުގެ ސާފްފައިދާގެ ގޮތުގައި 725 މިލިއަން ރުފިޔާ ލިބުނުއިރު މިއި މިދިޔަ އަހަރުގެ ތިންވަނަ ކުއާޓަރާ އަޅާބަލާއިރު، 47 އިންސައްތަ އިތުރުވުމެކެވެ.

ބީއެމްއެލްގެ މިދިޔަ އަހަރުގެ ވިޔަފާރިއާ ގުޅޭގޮތުން ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ވިދާޅުވީ، ފާއިތުވެދިޔަ އަހަރުގެ ކާމިޔާބީއަށް ބަލާފައި އިތުރު ކާމިޔާބީއާ ހަމަޔަށް ވާސިލްވުމުގެ ޔަގީންކަން ބޮޑުވެގެން ހިނގައްޖެކަމަށެވެ. 

ބީއެމްއެލުން ވަނީ މިއަހަރު ނިމެންވާއިރަށް މުޅި ރާއްޖެއަށް އޭޓިއެމްގެ ހިދުމަތް ދީ ނިންމުމަށް ކަނޑައަޅާފައެވެ. ބީއެމްއެލުން ރާއްޖޭގެ 20 އަތޮޅެއްގައި 39 ގޮފި ގާއިމްކޮށްފައިވާއިރު، 95 ސެލްފް ސާވިސް ބޭންކިން ސެންޓަރު ގާއިމްކޮށްފައިވާކަން ފާހަގަކޮށްލެވެއެވެ.