ސީރިއާގެ ވަގުތީ ރައީސްކަމަށް އެގައުމުގެ ޑެ ފެކްޓޮ ލީޑަރު، އަހުމަދު އަލް ޝަރާ އައްޔަނުކޮށްފިއެވެ.
އަލް ޝަރާ މިމަގާމަށް އައްޔަނުކޮށްފައިވަނީ އެގައުމުގައި އައު ސަރުކާރެއް އުފެދުމާއި ހަމައަށް އުފައްދާފައިވާ ކައުންސިލަކުންނެވެ.
މިކަން ހާމަކޮށް އެގައުމުގެ ޑެ ފެކްޓޮ ސަރުކާރުގެ އަސްކަރިއްޔާގެ ތަރުޖަމާނު ހަސަން އަބްދުލް ޣަނީ ވިދާޅުވީ، އެގައުމުގެ އަސްކަރިއްޔާގެ ބައިތައް އުވާލުމަށް ނިންމާފައިވާކަމަށާއި، މިއާއިއެކު ސީރިއާގައި އެތައް އަހަރެއް ވަންދެން ވެރިކަން ކުރި ބާތު ޕާޓީވެސް އުވާލަން ނިންމާފައިވާކަމަށެވެ.
ރައީސްކަމަށް އައްޔަނުކުރެވުމާއިއެކު އެގައުމުގައި ކުރިން އަމަލުކުރަމުން އައި ގާނޫނުތައް އުވާލައި، އައު ގާނޫނެއް ހެދުމަށްޓަކައި ކައުންސިލެއް އުފެއްދުމަށް އަލް ޝަރާ ވަނީ ނިންމާފައެވެ.
މިއާއިއެކު ސީރިއާގެ ކޮމާންޑަރުންނާއި މުޚާތަބުކޮށް ވާހަކަދައްކަމުން އަލް ޝަރާ ވިދާޅުވީ، ސީރިއާގެ އައު ސަރުކާރަސް ކުރިމަތިވެފައިވަނީ ވަރަށް ބޮޑު ޒިންމާއެއް ކަމަށާއި، އަމާޒަކީ އެގައުމުގެ ބާރުތައް ގާނޫނީ ގޮތަކަށް އެކުލަވާލުން ކަމަށެވެ.
މީގެ ކުރިން އަލް ޝަރާ ވަނީ އެގައުމުގައި އިންތިހާބުތައް ބޭއްވުމަށް 4 އަހަރު ނަގާނެކަމަށް ލަފާކުރާކަމަށް ބުނެފައެވެ.
ސީރިއާގެ ވެރިކަމަށް ވަގުތީ ގޮތުން އަލް ޝަރާ އައްޔަނުކޮށްފައިމިވަނީ ގިނަ ދުވަސްތަކެއް ވަންދެން އެގައުމުގެ ރައީސްކަމުގައި ހުންނެވި ބައްޝާރު އަލް އަސަދުގެ ވެރިކަން މިދިޔަ އަހަރުގެ ޑިސެންބަރު މަހުގެ 8 ވަނަ ދުވަހު ވެއްޓުމާއި ގުޅިގެންނެވެ.
Advertisement
This content is created and paid for by advertisers and does not involve Voice Journalists
