މާލޭގެ ހެންވޭރުގައި ހުންނަ ގެއެއްގެތެރޭގައި ސިނގިރޭޓް އުފައްދާކަމުގެ ތުހުމަތުގައި ފުލުހުން އެ ގެއަށްވަދެއްޖެއެވެ.

މައުލޫމާތު ލިބިފައިވާ ގޮތުގައި ފުލުހުން ވަދެފައިވަނީ ހ.ހުޅުގަލީގައި ހުންނަ އެޕާޓްމަންޓަކަށެވެ. މިކަމާ ގުޅިގެން ފުލުހުން ބުނެފައިވަނީ، ހެންވޭރު ގެއެއްގައި ހިންގާ ޕްރައިވެޓް އޮފީހެއްގެ ތެރޭގައި ސިނގިރޭޓް އުފައްދާކަމަށް ފުލުހުންނަށް މައުލޫމާތު ލިބިގެން ކޯޓް އަމުރެއްގެ ދަށުން އެތަން ފުލުހުން ބަލަމުންދާކަމަށެވެ.

ހ.ހުޅުގައްޔަކީ ދައުލަތަށް ވަރަށްގިނަ ދުވަހު ހިދުމަތްކުރެއްވި އިބްރާހިމް ހުސައިން ޒަކީގެ ގެއެވެ. ހުޅުގައްޔަކީ މީގެ 12 ވަރަކަށް އަހަރުކުރިން މަސާޖުޕާލާއެއް ހިންގުމުގެ ތުހުމަތުގައިވެސް ފުލުހުން ބަލާފާސްކުރި ގެއެއްކަން ފާހަގަކޮށްލެވެއެވެ. ފުލުހުން މިރޭ ހުޅުގައްޔަށް ވަދެ އެޕާޓްމަންޓެއް ބަލައި ފާސްކުރުމަށްވަދެ، އެތަނުން ފޮށިތަކެއް ކަމަށް ބެލެވޭ އެއްޗެހިތަކެއް ފުލުހުންގެ ޕިކަޕަކަށް އަރުވައިގެން ގެންދިޔަކަން ފާހަގަކޮށްލެވެއެވެ.

ދުންފަތް ކޮންޓްރޯލްކުރުމުގެ ގާނޫނުގެ 10 ވަނަ މާއްދާގެ ދަށުން ރާއްޖޭގައި އެއްވެސް މިންވަރަކަށް ދުންފަތް އަދި ދުންފަތުގެ ބާވަތްތައް އުފެއްދުމަކީ މަނާކަމެކެވެ. އެ ޤާނޫނުގައި ބަޔާންކޮށްފައިވާގޮތުން ދުންފަތާއި، ދުންފަތުގެ ތަނޑިއާއި، ނިކޮޓިންއާއި، އެނޫންވެސް އެބާވަތުގެ އެއްވެސް މިންވަރަކަށް ހިމެނޭގޮތަށް ތައްޔާރުކޮށް ހަށިގަނޑަށް ވާސިލްވާގޮތަށް ހަދާފައި ހުންނަ ކޮންމެ އެއްޗެއްމެ ބެލެވޭނީ ދުންފަތުގެ ބާވަތެއްގެ ގޮތުގައެވެ.

ދުންފަތާއި ދުންފަތް ބޭނުންކޮށްގެން ތައްޔާރުކޮށްފައި ހުންނަ ސިނގިރޭޓާއި ބިޑިން ނަގާ ޑިއުޓީ މިދިޔަ އޮކްޓޯބަރުމަހުގެ 31 ވަނަ ދުވަހުން ފެށިގެން ބޮޑުކޮށްފައިވާއިރު، ދުންފަތުގެ ބާވަތްތަކަށް އޮތް ޑިމާންޑުވަނީ ވަރަށްބޮޑަށް އިތުރުވެފައެވެ.