ޤަވާއިދާ ހިލާފަށް ރާއްޖެއިން ބޭރުކުރަން އުޅުނު މިޔަރުމަހާއި މަޑިމަސްތައް ބޭރުކުރަން އުޅުނު ކުންފުނީގެ ނަން، މޯލްޑިވްސް ކަސްޓަމްސް ސާވިސް އިން ހާމަކޮށްފިއެވެ.

ކަސްޓަމްސްއިން އެކްސްގައި ކުރި ޕޯސްޓެއްގައި ބުނެފައިވަނީ، މިޔަރުމަހާއި މަޑިމަސް ބޭރުކުރުމުގައި ހަރަކާތްތެރިވީ ދަ ކްރިސްޓަލް ކޮންޕެނީ ޕްރައިވެޓް ލިމިޓެޑް ނަމަކައް ކިޔާ ކުންފުންޏަކުން ކަމަށެވެ. އެތަކެތި ކަސްޓަމްސްއަށް ފެނިފައިވަނީ، މިދިޔަ އަހަރުގެ ނޮވެމްބަރުމަހުގެ 7 ވަނަ ދުވަހު ކަސްޓަމްސްއިން ބަލާފާސްކުރި މުދާ ޝިޕްމެންޓެއްގެ ތެރެއިންނެވެ. މިޔަރު މަހާއި މަޑި މަސް ހުރި 45 ފޮށިގަނޑުން (ޖުމުލަ 582 ކިލޯ) ހުއްޓެވެ. 

ކަސްޓަމްސް އިން ބުނީ މިކަމާ ގުޅިގެން އެ އިދާރާއި، ކަމާބެހޭ އެހެން އިދާރާތަކުން ބަލަންޖެހޭ ބެލުންތައް ބެލުމަށްފަހު، ފުރިހަމަ ކުރަންޖެހޭ އިޖުރާއަތުތައް ފުރިހަމަކުރުމަށްފަހު ޑިސެމްބަރުމަހުގެ 22 ވަނަ ދުވަހު، އެތަކެތި ނައްތާލާފައިވާކަމަށެވެ. ކަސްޓަމްސްއިން ބުނީ އެ މައްސަލަ ތަހުގީގުކުރަމުންދާކަމަށެވެ. 

ކަނޑުފަޅުގެ ދިރުންތަކުގެ ތެރެއިން ރާއްޖޭގައި މިޔަރާއި މަޑި ހިމެނެނީ މަސްވެރިކަމުގެ އާއްމު ގަވާއިދުގެ ދަށުން ހިފުމާއި މެރުން މަނައެވެ. މި ބާވަތްތައް ހިމެނެނީ ދުނިޔެއިން ނެތިދާނެކަމުގެ ބިރުހީވާތީވެ، ރައްކާތެރިކުރެވިފައިވާ ދިރުންތަކުގެ ތެރެއިންނެވެ. ނަމަވެސް މީގެ ތެރެއިން މިޔަރު ގިނަވެ، މަސްވެރިކަމުގެ ތެރެއިން ފަރުމަހުގެ މަސްވެރިކަމަށް މިޔަރުގެ އުނދަގޫ ވަރަށް ބޮޑުކަމަށް މަސްވެރިން ޝަކުވާކުރެއެވެ.