ސަރުކާރާއި ރައްޔިތުން ހިއްސާވާ ވިޔަފާރިު ކުންފުނި އެސްޓީއޯއަށް މިދިޔަ އަހަރު ސާފްފައިދާގެ ގޮތުގައި 717 މިލިއަން ރުފިޔާ ލިބިއްޖެއެވެ.

އެސްޓީއޯގެ މިދިޔަ އަހަރުގެ އެންމެ ފަހު ކުއާޓަރުގެ މާލީހިސާބުތަކާ ގުޅޭގޮތުން އެކުންފުނިން ނެރުނު ބަޔާނުގައި ބުނެފައިވަނީ، މިދިޔަ އަހަރު ޓެކްސްއަށް ކެނޑުމުގެ ކުރިން ސާފްފައިދާގެ ގޮތުގައި 812 މިލިއަން ރުފިޔާ ލިބިފައިވާކަމަށާއި، މިއީ 2023 ވަނަ އަހަރާ އަޅާބަލައި 19 އިންސައްތައިގެ ދަށްވުމެއް ކަމަށެވެ. މީގެ މައިގަނޑު ސަބަބަކީ، ތެލުގެ އަގުތަކަށް ގެނެވުނު ބަދަލާއިއެކު ޖުމްލަ ފައިދާ ދަށްވުމެވެ. 

އެސްޓީއޯއިން މިދިޔަ އަހަރު ކުރި ވިޔަފާރިއަށް ޖުމްލަ އާމްދަނީގެ ގޮތުގައި 15 ބިލިއަން ރުފިޔާ ވަނީ ލިބިފައެވެ. މިއީ 2023 ވަނަ އަހަރާ އަޅާބަލާއިރު 6 އިންސައްތަ ދަށްވުމެކެވެ. އެސްޓީއޯއަށް މިދިޔަ އަހަރު ލިބުނު އާމްދަނީ ދަށްވުމުގެ މައިގަނޑު ސަބަބަކީ ދުނިޔޭގެ ބާޒާރުގައި ތެލުގެ އަގަށް އައިބަދަލާއިއެކު ކުންފުނިން ވިއްކަމުން ދިޔަ ތެލުގެ އަގު ހެޔޮކުރުމުންނެވެ. އެސްޓީއޯއިން ވަނީ މިދިޔަ އަހަރުގެ ތެރޭގައި ތެލުގެ އަގުތައް ތިން ފަހަރެއްގެ މަތިން ދަށްކޮށްފައެވެ. މިކަމުގެ ސަބަބުން ތެލުގެ ވިޔަފާރިން ލިބުނު އާމްދަނީ ދަށްވެފައިވާކަމަށް މާލީހިސާބުތަކުން ދައްކައެވެ.

Advertisement

އެސްޓީއޯގެ މިދިޔަ އަހަރުގެ އެންމެ ފަހު ކުއާޓަރުގެ މާލީބަޔާނަށް ބަލާއިރު، މި ކުއާޓަރުގައި ޖުމްލަ އާމްދަނީގެ ގޮތުގައި ވަނީ 3.8 ބިލިއަން ރުފިޔާ ލިބިފައެވެ. މިއީ މީގެ ކުރީ ކުއާޓާރއާއި އަޅާ ބަލައިއިރު 7 އިންސައްތައިގެ ކުރިއެރުމެކެވެ. އެސްޓީއޯއިން ބުނީ، މީގެ މައިގަނޑު ސަބަބަކީ ކުންފުނިން ކުރަމުންގެންދާ ވިޔަފާރިތައް ރަގަޅުވެ އާމްދަނީ އިތުރުވަފެއިވުމެވެ. މިއާއިއެކު ޖުމްލަ ފައިދާ އޭގެ ކުރީ ކުއާޓަރާއި އަޅާ ބަލާއިރު8 އިންސައްތައިން އިތުރުވެ، ޖުމްލަ ފައިދާގެ ގޮތުގައި ވަނީ 637 މިލިއަން ރުފިޔާ ލިބިފައިވާކަމަށް އެސްޓީއޯއިން ބުނެއެވެ.