އައްޑޫސިޓީ ހަންކެނޑެ ބްރިޖް، އާއްމު ދަތުރުފަތުރަށް ހުޅުވާލައިފިއެވެ.

މިކަމާ ގުޅޭގޮތުން އިމާރަތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން އެކްސްގައި ކުރި ޕޯސްޓެއްގައި ބުނެފައިވަނީ،  އައްޑޫ ރޯޑް އެންޑް ސްޓޯމް ވޯޓަރ ޑްރެއިނޭޖް ޑިވެލޮޕްމަންޓް ޕްރޮޖެކްޓްގައި ހިމެނޭ ހަންކެޑެ ޑީޓުއަރ ލިންކް ރޯޑްގެ މަސައްކަތްތައް ނިންމުމަށްފަހު ރޭ ދަންވަރު 12 އިން ފެށިގެން ބްރިޖް އާއްމުކޮށް ހުޅުވާލާފައިވާކަމަށެވެ.

އައްޑޫ ސިޓީއަށް ނިސްބަތްވާ ހިތަދޫއާއި މަރަދޫ ގުޅާލަދޭ މި ބްރިޖް މަޝްރޫޢު ކުރިއަށްގެންގޮސްފައިވަނީ، އިންޑިއާގެ އެގްޒިމް ބެންކުގެ ލައިން އޮފް ކްރެޑިޓް ފެސިލިޓީގެ ދަށުންނެވެ. ބްރިޖްގެ އަމަލީ މަސައްކަތް 2021 ވަނަ އަހަރު ފެށިގެންދިޔައިރު، ބްރިޖް މަސައްކަތްކޮށްފައިވަނީ އިންޑިއާގެ އެފްކޮންސް ކުންފުނިންނެވެ.

ހަންކެނޑެ ބްރިޖް އާއްމު ދަތުރުފަތުރަށް ރޭ ދަންވަރު ހުޅުވާމިލީ ބްރިޖްގެ މަސައްކަތް ނިމިފައި އޮންނަތާ ދުވަސްތަކެއް ފަހުންނެވެ. މިކަމާ ގުޅޭގޮތުން އިމާރަތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން ބުނެފައިވަނީ އާއްމު ދަތުރުފަތުރަށް ބްރިޖް ހުޅުވާލުން ލަސްވީ ސަލާމަތީގޮތުން ކަށަވަރުކުރަންޖެހޭ ކަންކަން ކުރުމަށްޓަކަައެވެ. ހަންކެނޑެ ބްރިޖް މަޝްރޫޢުއަކީ މުޅި އައްޑޫސިތީ މަގުހެދުމުގެ 20 އިންސައްތަ މަސައްކަތެވެ. އައްޑޫސިޓީގެ ހުރިހާ ރަށެއްގެ މަގުތައް ހެދުމާއި ފެން ހިންދުމުގެ ނިޒާމު ޤާއިމްކުރުމާ އެއްކޮށް ކުރިއަށްގެންދިޔަ މި މަޝްރޫޢުގެ ޖުމްލަ އަގަކީ ގާތްގަނޑަކަށް 1 ބިލިއަން ރުފިޔާއެވެ.

ހަންކެނޑެ ބްރިޖަކީ 1.4 ކިލޯ މީޓަރުގެ ދިގު ބްރިޖެކެވެ. މި ބްރިޖްގައި 4 ލޭނު ހުންނައިރު، އައްޑޫސިޓީ ކައުންސިލުން ވަނީ، ބްރިޖާ ގުޅިފައިވާ ޓްރެފިކް ފްލޯއަށްވެސް ބަދަލުތައް ގެނެސްފައެވެ.