އަވައްޓެރި އިންޑިއާއިން ދިވެހިރާއްޖެއަށް ދިނުމަށް ނިންމާފައިވާ އެހީތެރިކަން އިތުރުކޮށްފިއެވެ.

އިންޑިއާއިން ރާއްޖެއަށް ދިނުމަށް ނިންމާފައިވާ އެހީތެރިކަން އިތުރުކުރިކަން ހާމަވެފައިވަނީ ކުރިއަށްއޮތް އަހަރަށް ލަފާކުރާ ބަޖެޓް ތަފްސީލްތަކުންނެވެ.

ބަޖެޓް ތަފްސީލުތައް ޤާނޫނުހަދާ މަޖިލީހަށް ހުށަހެޅިއިރު އިންޑިއާއިން ޤައުމުތަކަށްދޭ އެހީގެ ބަޔަށް ބަލާއިރު، ރާއްޖެއަށް ދިނުމަށް ކަނޑައަޅާފައިވަނީ، 600 ކްރޯޑް ރުޕީސްއެވެ. އެއީ ދިވެހި ފައިސާއިން ބަލާނަމަ ގާތްގަނޑަކަށް އެއް ބިލިއަން ރުފިޔާއެވެ.މިދިޔަ އަހަރުގެ ބަޖެޓްގައި ރާއްޖެއަށް ދިނުމަށް އިންޑިއާއިން ކަނޑައެޅީ 400 ކްރޯޑް ރުޕީސްއެވެ. އިންޑިއާއިން ޤައުމުތަކަށްދޭ ބަޖެޓަށް ބަލާއިރު، މިފަހަރު އެންމެ ބޮޑު އަދަދެއް ދޭގޮތަށް ނިންމާފައިވަނީ ބޫޓާން އަދި ނޭޕާލަށެވެ.

ރާއްޖެއަށް އެހީތައް ދެމުން އަންނަ ޤައުމުތަކަށް ބަލާއިރު އިންޑިއާއަކީ އެންމެ ގިނައިން ރާއްޖެއަށް އެހީތެރިކަންދޭ ޤައުމެވެ. ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިދިޔަ އަހަރުގެ އޮކްޓޯބަރުމަހުގެ ތެރޭގައި އިންޑިއާއަށް ކުރެއްވި އެކި ރޮނގުތަކުން ރާއްޖެއަށް އެހީތެރިކަން ފޯރުކޮށްދިނުމުގެ އެއްބަސްވުންތަކުގައި ސޮއިކޮށްފައެވެ. އޭގެ ތެރޭގައި އިންޑިއާ އާއެކު ސޮއިކުރި 400 މިލިޔަން އެމެރިކާ ޑޮލަރު އަދި 30 ބިލިޔަން އިންޑިއަން ރުޕީސްގެ ކަރަންސީ ސްވޮޕް އެއްބަސްވުން ފާހަގަކޮށްލެވެއެވެ.