ޝަރީއަތް ނިމެންދެން ބަންދުކޮށްފައި ތިބި ގިނަ މީހުންނަކީ ބޮޑެތި ކުށްތައް ކޮށްފައިވާ ކުށްވެރިން ކަމަށާއި އެ މީހުން ދޫކޮށްލައިފިނަމަ ޝަރީއަތަށާއި މުޖުތަމައަށް ނުރައްކާ ވެދާނެ ކަމަށް ކޮމިޝަނާ އޮފް ޕޮލިސް އަލީ ޝުޖާއު ވިދާޅުވެއްޖެ އެވެ.
ޝަރީޢަތް ނިމެންދެން ބަންދުގައި 435 މީހުން އެބަތިބި އިރު، ޕްރޮސިކިއުޓަރ ޖެނެރަލްގެ އޮފީހުން އިންތިޒާމުކޮށްގެން، ޝަރީޢަތް ނިމެންދެން މީހުން ބަންދުކުރުމާ ގުޅޭ މައްސަލަތައް ހައްލުކުރުމަށް އިއްޔެ ބޭއްވި "ބަންދު ފޯރަމް"ގައި ވާހަކަދައްކަވަމުން ސީޕީ ޝުޖާއު ވިދާޅުވީ ބޮޑެތި ކުށްތަކަށް އަރައިގެންފައިވާ މީގެ ކުރިންވެސް ބަންދުން ދޫކޮށްލުމުން އޭގެ ނޭދެވޭ އަސަރު ޝަރީޢަތަށާއި މުޖުތަމަޢަށްކޮށްފައި އެބަހުރިކަމަށެވެ.
"މިދަންނަވާ ކަހަލަ މީހުން ބަންދުން ދުކޮށްލުމުން އެކަމުގެ ނޭދެވޭ އަސަރު ޝަރީއަތްތަކަށް އަދި މުޖުތަމަޢަށް ކޮށްފައި އެބަހުރި. މިކަހަލަ މީހުން ދޫކޮށްލާނަމަ އެމީހުންގެ ކަންކަން ބަލައި މޮނިޓާކުރެވޭނެ ރަނގަޅު ނިޒާމެއްވެސް އޮންނަންޖެހޭ. ޤާނޫނުތަކަށް ބަދަލު ގެނެސްގެން ޓެގް އެޅުވިގެން މޮނިޓަރކުރެވިދާނެ. ޤާނޫނީ އޮނިގަނޑެއްގެ ތެރެއިން މޮނިޓަރކުރެވޭނެ ނިޒާމެއް ނެތި ހައްޔަރުކުރުމުގެ މަޤުޞައްދު ހާސިލެއް ނުވާނެ. މިވަގުތު ބަޔަކު ދޫކޮށްލުމަކީ ރަނގަޅު ކަމެއް ނޫން."
ކޮމިޝަނަރ އޮފް ޕޮލިސް ޢަލީ ޝުޖާޢު
ސީޕީ އިތުރަށް ވިދާޅުވީ، ޝަރީއަތް ނިމެންދެން ބަންދުކޮށްފައި މިވަގުތުވެސް ގިނަ ބަޔަކު އެބަ ތިބި ކަމަށެވެ. އަދި އެއީ ކަންބޮޑުވުން އޮތް މައްސަލައެއް ކަމަށްވީ ނަމަވެސް އޭގެތެރޭގައި ދޫކޮށްލައިގެން ނުވާނެ ބަޔަކު އެބަތިބި ކަމަށެވެ.
"ރިމާންޑްގައި މިތިބީ މަސްތުވާތަކެތީގައި މައްސަލަތަކުގައި ތިބި މީހުން. ޖިންސީގޯނާގެ ތުހުމަތުގައި ބަންދުކުރެވިފައި ތިބި މީހުން. އެ ތުހުމަތު ކުރެވޭ ފަރާތްތައް ދޫވުމުކީ ޝަރީޢަތައް ނުފޫޒުތައް ފޯރުވިދާނެ ކަމެއް. ވިކްޓިމްސްއަށް އޮތް ނުރައްކަލެއް.. މިވަގުތު އެ ބަޔަކު ދޫކޮށްލުމަކީ ރަނގަޅު ކަމެއް ނޫން." ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވިއެވެ.
މިއާއެކު ސީޕީ ވިދާޅުވީ ކުށެއްގެ ތުހުމަތުގައި ހައްޔަރުކުރެވޭ މީހުންގެ މައްސަލަތައް ވީހާވެސް އަވަހަށް ތަހުގީގުކޮށް ދައުވާކުރަން ފޮނުވުމަށް ފުލުހުން ވަރަށް ބޮޑަށް އިސްކަންދޭ ކަމަށެވެ.
Advertisement
This content is created and paid for by advertisers and does not involve Voice Journalists
