މާލޭ ސަރަހައްދުގައި (މާލެ، ހުޅުމާލެ، ވިލިމާލެ، ތިލަފުށި، ގުޅީފަޅު) މަސައްކަތްކުރާ ބިދޭސީންނަށް ވަޒީފާ ދޭ ފަރާތްތަކުން، އެ މީހުންގެ މައުލޫމާތު އަންނަ މަހުގެ 15ގެ ކުރިން ހޯމް މިނިިސްޓްރީއާ ހިއްސާކުރުމަށް އެ މިނިސްޓްރީން މިއަދު އަންގައިފިއެވެ.
ހޯމް މިނިސްޓްރީން މިއަދު ނެރުނު އިއުލާނެއްގައި ވަނީ، މާލެ ސަރަހައްދުގައި ވަޒިފާ އަދާކުރާ ބިދޭސީންގެ އިނގިލީގެ ނިޝާނާއި ފޮޓޯ ހިމެނޭ ގޮތަށް ބައޯމެޓްރިކްސް ހިއްސާކުރުމުގެ މަސައްކަތް، މާރިޗު މަހުގެ 15 ވަނަ ދުވަހުގެ ކުރިން ވަޒީފާދޭ ފަރާތްތަކުން ހޯމް މިނިސްޓްރީގެ ފޮރިން ލޭބާ ޑިޕާޓެމެންޓާ ގުޅިގެން ކުރިއަށް ގެންދިޔުމަށް އެދިފައެވެ.
އަދި އެ މުއްދަތުގެ ތެރޭގައި މައުލޫމާތު އަދާހަމަ ނުކުރާ ފަރާތްތައް އެކްސްޕެޓް ސިސްޓަމުން ސަސްޕެންޑުކޮށް އެ މީހުންނަށްދޭ ޚިދުމަތްތައް މެދުކަނޑާލާނެ ކަމަށް މިނިސްޓްރީން ވަނީ ބުނެފައެވެ.
އެ އިއުލާނުގައި އިތުރަށް ބުނީ މާލޭ ސަރަަހައްދުގެ ބިދޭސީންގެ މައުލޫމާތު ނެގުމާއި އޮޕަރޭޝަން ކުރަނގީގެ ދަށުން ސަރުކާރުން ތަަންފީޒު ކުުރުމަށް އެކަށައަޅާފައިވާ ހުރިހާ ކަންކަން ވިލަރެސްކުރަނީ ނެޝަނަލް ސެންޓާ ފޯ އިންފޮމޭޝަން ޓެކްނޮލޮޖީ (އެންސީއައިޓީ)ގައި، އެ އޮޕަރޭޝަނަށް ޚާއްސަކޮށް ގާއިމުކޮށްފައިވާ ޖޮއިންޓް އޮޕަރޭޝަން ސެންޓަރުގައި ކަމަށެވެ.
އެ ސެންޓަރުން ޚިދުމަތް ދެމުންދާނީ ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 9:00އިން 22:00އަށެވެ.
އަދި އޮޕަރޭޝަން ކުރަނގިއާ ގުޅޭ އިތުރު މައުލޫމާތު 7690228އަށް ގުޅުމުން ނުވަތަ [email protected] އަށް މެއިލް ކުރުމުން ލިބޭނެ ކަމަށްވެސް ހޯމް މިނިސްޓްރީން ބުންޏެވެ.
Advertisement
This content is created and paid for by advertisers and does not involve Voice Journalists
