އެސްޓީއޯ ކޮންސްޓްރަކްޝަން ސޮލިއުޝަންސްގެ ރޯދަ ސޭލް މިއަދު ފަށައިފިއެވެ.

މި ސޭލް އަކީ ކޮންމެ އަހަރެއްގެވެސް ރަމަޟާންމަހާ ދިމާކޮށް އެސްޓީއޯ ކޮންސްޓްރަކްޝަނުން ކުރިއަށްގެންދާ ސޭލެކެވެ. ރޯދަ ސޭލް ފައްޓަވައި ދެއްވީ ޑިރެކްޓަރ އޮފް ކޮންސްޓްރަކްޝަން ސޮލިއުޝަންސް މުހައްމަދު އީމާން އަދި ވެލިގާ ހާޑްވެއަރ ގެ ޑިރެކްޓަރ  ޒައިދު މުހައްމަދެވެ. 

މިފަހަރުގެ ސޭލަށް އަގުހުރި އިނާމްތަކެއް ކަނޑައެޅިފައިވާއިރު، މި ޕްރޮމޯޝަނުގައި 500 ރުފިޔާއިން މަތީގެ ކޮންމެ ވިޔަފާރިއަކަށް ކޫޕަނެއް ލިބޭނޭކަމަށް އެސްޓީއޯ ކޮންސްޓްރަކްޝަނުން ބުނެއެވެ.

އެސްޓީއޯ ކޮންސްޓްރަކްޝަން ސޮލިއުޝަންސްގެ ރޯދަސޭލް ފެށުމުގެ ތެރެއިން.. ފޮޓޯ: އެސްޓީއޯ

މި ޕްރޮމޯޝަންގައި ނިޕޯން ޕެއިންޓް އަދި މަކިޓާ ބްރޭންޑްގެ ޕްރޮޑަކްޓްތަކުން ހާއްސަ ޑިސްކައުންޓް ކަސްޓަމަރުންނަށް ލިބޭއިރު، ނިޕޯން ޕެއިންޓް އިން %20 އަދި މަކިޓާގެ ޕްރޮޑަކްޓްތަކުން %50 ޑިސްކައުންޓް ލިބެއެވެ.

މިއަހަރު ބޮޑު އިނާމުގެ ގޮތުގައި، ބައިލައްކަ ރުފިޔާގެ އަގުހުރި މުދާ ކޮންމެވެސް އެއް ނަސީބުވެރިއަކަށް ލިބިގެންދާއިރު، ޕްރޮމޯޝަން ކުރިއަށްދާނީ މާޗްމަހުގެ 31 ވަނަ ދުވަހުގެ ނިޔަލަށެވެ. މިސޭލް އެސްޓީއޯ ކޮންސްޓްރަކްޝަން ސޮލިއުޝަންސްގެ އައުޓްލެޓް ތަކުގެ އިތުރުން ވެލިގާ ހާޑްވެއަރގެ އައުޓްލެޓް ތަކުގައި ކުރިއަށްގެންދިއުމަށް ވަނީ ހަމަޖެހިފައެވެ. މީގެ އިތުރުން އެސްޓީއޯގެ ރީޖަލަން އައުޓްލެޓްތަކުގައިވެސް މި ޕްރޮމޯޝަން ކުރިއަށްދާނޭކަމަށް އެސްޓީއޯއިން ބުނެއެވެ.