ދިވެހިރާއްޖޭގައި ހުންނަ އިންޑިޔާގެ ހައިކޮމިޝަނާއި، އިންޑިއަން ކަލްޗަރަލް ސެންޓަރާއި ގުޅިގެން ބާއްވަން ތައްޔާރުވަމުންދިޔަ ”ޕޮންގަލް 2025“ ފެސްޓިވަލް ކެންސަލް ކޮށްފިއެވެ.
މިމަހު ހަތް ވަނަ ދުވަހު ބާއްވަން ރާވަމުން ދިޔަ މި ޕޮންގަލް ފެސްޓިވަލަކީ ޓަމިލް މީހުން އިރަށް އަޅުކަންކޮށް ޝުކުރުއަދާކުރުމުގެ ގޮތުން ބާއްވާ ހިންދޫ ދީނުގެ ދީނީ އަޅު ކަމެކެވެ.
އެ ފެސްޓިވަލް ރާއްޖޭގައިވެސް ބޭއްވުމަށް އިންޑިޔާ ހައިކޮމިޝަނުން ނިންމައި އެކަން އާއްމު ކުރުމުން ދީނީ ޢިލްމުވެރިން ވަނީ އެއީ ޝިރުކުގެ ޢަމަލެއް ކަމަށް ބުނެ އެކަން ހުއްޓުވުމަށް ސަރުކާރަށް ގޮވާލައި އަޑު އުފުލާފައެވެ. އަދި އާއްމު ރައްޔިތުންވެސް ވަނީ އެފަދަ ކަންކަން ރާއްޖޭގައި ބާއްވަން ރާވާތީ އެކަމާ ދެކޮޅަށް ޝުޢޫރު ފާޅުކޮށް އެކަން ހުއްޓުވަން ފުލުހުންނާއި ކަމާބެހޭ އިދާރާތަކަށް ގޮވާލާފައެވެ.
އެކަމާއި ގުޅިގެން، ފުލުހުން ރޭ ކުރި ޕޯސްޓެއްގައި ބުނީ، މިމަހު ހަތް ވަނަ ދުވަހު ”ޕޮންގަލް 2025“ ނަމުގައި ބާއްވަން ރާވަމުންދިޔަ އެ ފެސްޓިވަލް ނުބޭއްވޭނެކަން އެ ފެސްޓިވަލް އިންތިޒާމް ކުރުމުގައި ހަރަކާތްތެރިވި ފަރާތަކަަށް ކަމާބެހޭ ފަރާތްތަކުން އަންގާފައިވާ ކަމަށެވެ.
އަދި އެ ފެސްޓިވަލް މިހާރު ކެންސަލް ކުރެވިފައިވާ ކަމަށްވެސް އިންތިޒާމް ކުރި ފަރާތުން މައުލޫމާތު ދޭ ކަމަށް ބުނެފައިވެއެވެ.
މިއާއެކު ފުލުހުން ބުނީ، މިފަދަ ހަރަކާތެއް ހިންގާ ނަމަ ފުލުހުން އެކަން ހުއްޓުވާނެ ކަމަށެވެ.
Advertisement
This content is created and paid for by advertisers and does not involve Voice Journalists
