ސަރުކާރު ކުންފުނިތަކުގެ މުވައްޒަފުންގެ އަދަދު 36،753 އަށް އަރައިފިއެވެ. މިއީ ކުރީ ކުއާޓަރާއި އަޅާބަލައި 2،698 މުވައްޒަފުން އިތުރު އަދަދެކެވެ. 

ޕްރައިވަޓައިޒޭޝަން އެންޑު ކޯޕަރަޓައިޒޭޝަން ބޯޑު (ޕީސީބީ)ން އާންމުކޮށްފައިވާ ކުއާޓާލީ ރިޕޯޓުގައިވާ ގޮތުން އެންމެ މުވައްޒަފުން ގިނަ ކުންފުންޏަކީ ފެނަކަ ކޯޕަރޭޝަން ލިމިޓެޑެވެ. އެ ކުންފުނީގައި 7،045 މުވައްޒަފުން އެބަތިއްބެވެ.

އަދި މި ކުއާޓަރ ގައި ފެނަކައިން ކުންފުނީގެ މުވައްޒަފުންގެ ޚަރަދުގެ ގޮތުގައި 222 މިލިއަން ހޭދަކޮށްފައިވާ ކަމަށް ރިޕޯޓްގައިވާ އިރު އެއީ ދެވަނައަށް އެންމެ ގިނައިން މުވައްޒަފުންނަށް ޚަރަދުކުރި ކުންފުނިކަން ރިޕޯޓުން އެނގެއެވެ.

ފެނަކައާއި ޖެހިގެން ދެން އެންމެ މުވައްޒަފުން ގިނައީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގައެވެ. އެތަނުގައި 4،518 މުވައްޒަފުން އެބަ ތިއްބެވެ. މުވައްޒަފުންގެ ޚަރަދު އެންމެ ބޮޑު ކުންފުންޏަކީވެސް އެމްއޭސީއެލެވެ. އެ ކުންފުނިން މުވައްޒަފުންގެ ޚަރަދަށް 270.68 މިލިއަން ރުފިޔާ ހޭދަކުރެއެވެ.

މި ރިޕޯޓު ގައި ބުނެފައިވާ ގޮތުން ސަރުކާރު ހިއްސާވާ 30 ކުންފުނީގެ ތެރެއިން 16 ކުންފުންޏަކީ ލިބޭ އާމްދަނީން ދެކޮޅު ޖެއްސޭ (ސެލްފް ސަފިޝެންޓް) ކުންފުނިތަކެވެ. އަދި، 14 ކުންފުންޏަކީ ދައުލަތުގެ ބަޖެޓުން ޚަރަދުކޮށްގެން (ގަވަންމެންޓް ފަންޑެޑް) ކުންފުނިތަކެވެ.