މަޖިލީސް ރައީސް, ޢަބްދުއްރަޙީމް ޢަބްދުﷲ އަޒުލުކުރަން ޕީއެންސީ އިން މަސައްކަތް ނުކުރާ ކަމަށް ޕީއެންސީގެ ޕީޖީ ލީޑަރ އިބްރާހިމް ފަލާހް ވިދާޅުވެއްޖެއެވެ.
"ވޮއިސް" އިން ކުރި ސުވާލަކަށް ޖަވާބުދެއްވަމުން ފަލާހް މިފަދައިން ވިދާޅުވީ މަޖިލީސް ރައީސްގެ ދަރިކަލުން ކަމުގައިވާ ކުރީގެ ޓޫރިޒަމް މިނިސްޓަރ ފައިސަލް އިބްރާހީމް އެމަޤާމުން ވަކިކުރެއްވި ފަހުން ބައެއް ފަރާތްތަކުން ދައްކާ ވާހަކަތަކުގެ ރައްދުގައެވެ.
ކުރީގެ ޓޫރިޒަމް މިނިސްޓަރ، ދާދި ފަހުން މަޤާމުން ވަކިކުރެއްވުމަކީ ޕީއެންސީ ބައިބައިވުމުގެ ފެށުމުގެ ގޮތުގައި ބައެއް ފަރާތްތަކުން ސިފަކުރަމުންދާކަން ފާހަގަކޮށްލަންޖެހެއެވެ. ހަމަ އެފަދައިން މަޖިލީސް ރައީސްވެސް މަޤާމުން ވަކިކުރެއްވުން އެކަށީގެންވާ ކަމަށް ބައެއް ފަރާތްތަކުން ލަފާކުރަމުންދާ ވާހަކައިގެ ރައްދުގައި ފަލާހު ވިދާޅުވީ އެއީ "ބޮޑު ދޮގެއް" ކަމަށެވެ. އަދި އެފަދަ މަސައްކަތެއް ޕީއެންސީ އިން ކުރަން އުޅޭ ކަމުގެ ވާހަކަ ދޮގުކުރައްްވާފައި ވެއެވެ.
މީގެ އިތުރަށްވެސް، ކުރީ ސަރުކާރުގެ ވެރިކަމުގައި އެމްޑީޕީގެ ތެރޭގައި އުފެދުނު ބައިބައިވުން ޕީއެންސީ ތެރޭގައި ނުއުފެދޭނެ ކަމަށް ފަލާހް ވިދާޅުވިއެވެ. މި މޭރުމުން ފަލާހް އިޝާރާތްކުރައްވާފައިވަނީ ނިމިދިޔަ އެމްޑީޕީ ސަރުކާރުގައި ކުރީގެ މަޖިލީސް ރައީސް މުޙައްމަދު ނަޝީދު، 19 ވަނަ ރައްޔިތުންގެ މަޖިލީހުގެ ރައީސް ކަމުގެ މަގާމުން އަޒުލުކުރެއްވުމަށް އެމްޑީޕީގެ މެޖޯރިޓީ އޮތް މަޖިލީހުން ކުރެއްވި މަސައްކަތަށެވެ.
މަޖިލީސް ރައީސްގެ ދަރިކަލުން މިނިސްޓަރުކަމުން ވަކިކުރައްވާފައިވަނީ ނިމިދިޔަ މަހުގެ 28 ވަނަ ދުވަހުއެވެ. ނަމަވެސް އޭނާ މަޤާމުން ވަކިކުރެއްވި ސަަބަބެއް ސަރުކާރުން ހާމަކޮށްފައި ނުވެއެވެ. އޭނާ މަޤާމުން ވަކިކުރެއްވުމަށްފަހު މިހާރު ޓޫރިޒަމް މިނިސްޓްރީ ވަނީ އެންވާރަމެންޓް މިނިސްޓްރީގެ ދަށަށް ބަދަލުކޮށްފައެވެ.
Advertisement
This content is created and paid for by advertisers and does not involve Voice Journalists
