ރައްޔިތުންގެ މަޖިލީސް މި އަހަރު ފެށުމަށް ބޭއްވި ފުރަތަމަ ޖަލްސާ މިއަދު ބާއްވާފައިވާއިރު އެ ޖަލްސާގައި އޮތީ ރައީސުލްޖުމްހޫރިއްޔާ ރިޔާސީ ބަޔާން އިއްވެވުމެވެ. 

މީގެ ކުރިން، މަޖިލީސް އައު ދައުރަކަށް ހުޅުވުމަށް ބާއްވާ ޖަލްސާތައް ފެށުމުގެ ކުރިން ކީރިތި ޤުރުއާން ކިޔެވުމެއް ނޯވެއެވެ. އެ ޖަލްސާ ތަކުގައި ރައީސުލްޖުމްހޫރިއްޔާ ރިޔާސީ ބަޔާން އިއްވުން ކުރިއަށް ގެންދާއިރު، ޖަލްސާ ފަށަނީ އާދައިގެ މަތިން ދުވަހުގެ އެޖެންޑާއިންނެވެ. 

ކުރީގެ ރައީސް މުޙައްމަދު ނަޝީދު މަޖިލީހުގެ ރިޔާސަތު ބެލެހެއްޓެވިއިރު، ކުރީގެ ރައީސް އިބްރާޙީމް މުޙައްމަދު ޞާލިޙް ރިޔާސީ ބަޔާން އިއްވުމަށް ބޭއްވި ޖަލްސާއެއް، ރަސޫލާ ޞޢވ އަށް ސަލަވާތް ކިޔެވުމަށްފަހު ދުޢާއެއް ކޮށް ފައްޓަވާފައިވެއެވެ. އެ ޖަލްސާގައިވެސް ޤުރުއާން ކިޔަވާފައި ނުވެއެވެ. 

Advertisement

ނަމަވެސް، ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ފުރަތަމަ ރިޔާސީ ބަޔާން އިއްވެވުމާއި އެމަނިކުފާނު ރައީސް ކަމުގެ ހުވާ ކުރެއްވުމަށް މަޖިލީހުގެ ތަޅުމުން ބޭރުގައި ބޭއްވުނު ޖަލްސާ ފެށީ ޤުރުއާނުގެ ބަރަކާތުންނެވެ. 

އެފަހުން، މިދިޔަ އަހަރު، ކުރީގެ މަޖިލިސް ރައީސް މުޙައްމަދު އަސްލަމް ރިޔާސަތު ބަލަހައްޓަވައި، ރައީސް މުޢިއްޒުގެ ދެވަނަ ރިޔާސީ ބަޔާން އިއްވަވަން ބޭއްވުނު ޖަލްސާ ފެށުމަށްވެސް ޤުރުއާން ކިޔަވާފައި ނުވެއެވެ. 

ނަމަވެސް، މިއަދު، މަޖިލީހުގެ ތަޅުމުގައި، މަޖިލިސް އައު ދައުރަކަށް ފެށުމަށް، ބޭއްވުނު ޖަލްސާ ފަށާފައިވަނީ ކީރިތި ޤުރުއާނުގެ ބަރަކާތުންނެވެ. މިއީ މަޖިލީހުގެ ތާރީޚްގައިވެސް، އައު ދައުރަކަށް މަޖިލިސް ހުޅުވައި، ރައީސުލްޖުމްހޫރިއްޔާ ރިޔާސީ ބަޔާން އިއްވެވުމަށް ބޭއްވި ޖަލްސާއެއް ޤުރުއާނުގެ ބަރަކާތުން ފެށި ފުރަތަމަ ފަހަރެވެ. އެހެންކަމުން މިއަދަކީ މަޖިލީހުގެ ތާރީޚްގައިވެސް ފާހަގަކޮށްލަންޖެހޭ ޚާއްސަ ދުވަހަކަށް މިވަނީ ވެފައެވެ.