އައްޑޫސިޓީއަށް ބަނދަރުކުރި ކްރޫޒް ޝިޕަކުން 100 ފަތުރުވެރިން ޒިޔާރަތްކޮށްފިއެވެ. 

"ނޮބެލް ކެލެޑޯނިއާ" ނަމަކަށް ކިޔާ އެ އުޅަނދު އައްޑޫ ސިޓީ މަރަދޫގައި ބަނދަރުކޮށްފައި ވަނީ ހުކުރު ދުވަހުގެ މެންދުރު ފަހު އެވެ. އެ ކްރޫޒް ޝިޕް އައީ ‘މަންޓާ ޓްރަސްޓް’ އެޖެންސީގެ ދަށުންނެވެ. އުޅަނދުން މަރަދޫއަށް ފޭބި ފަތުރުވެރިންނަށް މަރުހަބާ ކިޔާފައިވަނީ ސަގާފީ ހަރަކާތްތަކާއެކުގައެވެ

މިކަމާ ގުޅޭގޮތް އައްޑުސިޓީ ކައުންސިލުން ބުނީ ކްރޫޒްޝިޕްގެ ފަތުރުވެރިން ވަނީ އައްޑޫ ސިޓީގެ އެކި ހިސާބުތަކަށް ޒިޔާރަތްކޮށް އައްޑޫ ނޭޗާ ޕާކާއި ތާރީހީ ބައެއް ތަންތަނަށް ޒިޔާރަތްކޮށްފައިވާކަމަށެވެ. މީގެ ތެރެއިން ނޭޗާ ޕާކަށް ކުރި ޒިޔާރަތަކީ އައްޑޫ ސިޓީ ކައުންސިލުން އިންތިޒާމްކުރި ހަރަކާތެކެވެ.

އައްޑޫސިޓީއަށް ބަނދަރުކުރި ކްރޫޒް ޝިޕުން ފޭބި ފަތުރުވެރިންގެ ބަޔަކު މަރަދޫފޭދޫގައި... ފޮޓޯ: އައްޑޫސިޓީ ކައުންސިލް

އައްޑޫއަކީ މީގެ ކުރިން ބޭރުގެ ކްރޫޒް ލައިނަރތައް ގަވާއިދުން ދަތުރުކުރާ ސަރަހައްދެކެވެ. ނަމަވެސް ކޯވިޑް-19 އަށް ފަހު ކްރޫޒް ބޯޓުފަަހަރުތައް އައްޑޫއަށް ބަނދަރުކުރާ އަދަދު މަދުކަމަށް ކައުންސިލުން ފާހަގަކުރެއެވެ. އައްޑޫސިޓީ ކައުންސިލުން އަންނަނީ ދެކުނުގެ ފަތުރުވެރިކަން އިސްތިހާރުކުރުމަށް ހަރަކާތްތަކެއް ހިންގަމުންނެވެ. 

އައްޑޫސިޓީއަށް ބަނދަރުކުރި ކްރޫޒް ޝިޕުން ފޭބި ފަތުރުވެރިންގެ ބަޔަކު މަރަދޫފޭދޫގައި... ފޮޓޯ: އައްޑޫސިޓީ ކައުންސިލް

އައްޑޫ ސިޓީ ފަތުރުވެރިންގެ މަންޒިލެއްގެ ގޮތުގައި ޕްރޮމޯޓް ކުރުމަށް ކުރަމުންދާ މަސައްކަތްތަކުގެ ދަށުން މިދިޔަ އަހަރުގެ ނޮވެމްބަރު މަހު އިނގިރޭސިވިލާތުގައި ބޭއްވި ވޯލްޑް ޓްރެވަލް މާކެޓް ފެއާގައި ކައުންސިލުން ވަނީ ބައިވެރިވެފަ އެވެ.

ގަން އިންޓަނޭޝަނަލް އެއާޕޯޓް އަޕްގްރޭޑް ކުރުމުގެ މަޝްރޫއު ނިމުމާ ގާތްވުމާއެކު، އައްޑޫ ސިޓީއަށް ސީދާ ދަތުރުތައް ތައާރަފް ކުރުމަށް ބޮޑެތި އެއާލައިންތަކާއެކު ސަރުކާރުންވަނީ މަޝްވަރާތައް ފަށާފަ އެވެ.

މީގެ އިތުރުން އައްޑޫ ސިޓީގައި އިންޓަގްރޭޓެޑް ޓޫރިޒަމް ތަރައްގީ ކުރުމަށް ހަންކެޑެ ތަރައްގީ ކުރުމުގެ މަސައްކަތްވެސް ކުރަމުންދާކަން ފާހަގަކޮށްލެވެއެވެ. އައްޑޫގައި ފަތުރުވެރިކަމަށް 6000 އެނދު ތަރައްގީކުރުމަކީ ރައީސް ޑރ. މުޙައްމަދު މުޢިއްޒުގެ ވައުދުފުޅެކެވެ.