ޓެކްސީ ޑްރައިވަރުން ކުރި މުޒާހަރާގައި ލިބުނު ގެއްލުމުގެ ބަދަލު ދިނުމަށް ގޮވާލާ ކުއްލި މައްސަލައެއް ރައްޔިތުންގެ މަޖިލީހަށް ވައްދައިފިއެވެ.
މި މައްސަލަ މަޖިލީހަށް ހުށަހަޅާފައިވަނީ އެމްޑީޕީ ތަމްސީލުކުރައްވާ ގަލޮޅު ދެކުނު ދާއިރާގެ މެންބަރ މީކާއީލު އަޙްމަދު ނަޞީމްއެވެ.
މީކާއީލް ހުށަހެޅި މި މައްސަލައިގައި ވަނީ ޑިސެމްބަރު 11، ގައި ޓެކްސީ ޑްރައިވަރުން ހުޅުމާލޭގައި ކުރި މުޒާހަރާއަށް ފުލުހުން ހުރަސް އަޅައި ޓެކްސީ ޑްރައިވަރުންތަކެއް ހައްޔަރު ކޮށްފައި ވަނީ ސުލްހަވެރިކަމާއެކު އެއްވެ އުޅުމުގެ މިނިވަންކަމާއި މުދާ މިލްކުކުރުމާއި މަސައްކަތް ކުރުމުގެ ހައްގަށް ހުރަސް އެޅޭ ގޮތަށް ކަމަށް ބުނެފައެވެ.
ވޯޓުގައި ބައިވެރިވީ މެންބަރުންގެ އިއްތިފާގުން މި މައްސަލަ މަޖިލީހުން ވަނީ ބަލައިގެންފައެވެ.
ޑިސެމްބަރ 11 ގައި ޓެކްސީ ޑްރައިވަރުން މުޒާހަރާކޮށްފައިވަނީ ސަރުކާރުން ޓެކްސީ ލައިނެއް އުފައްދަން އުޅޭކަން އިއުލާންކުރުމުންނެވެ. މުޒާހަރާ ކުރި ދުވަހު ޓެކްސީތައް ޓޯ ކުރުމުގެ ސަބަބުން ވަރަށް ގިނަ ޓެކްސީ ޑްރައިވަރުން ކާންބޯން ކުރާ މަސައްކަތަށް ގެއްލުންވިކަން މީކާއީލް ފާހަގަކުރިއެވެ.
އެއާއެކު، މީކާއީލް ވަނީ ޓެކްސީ ޑްރައިވަރުން މުޒާހަރާ ކުރި ދުވަހު ފުލުހުންގެ ފަރާތުން ޑްރައިވަރުންގެ ޓެކްސީތަކަށް ގެއްލުން ލިބުނު ކަމަށް ތުހުމަތުކޮށްފައެވެ. އެ ގެއްލުމުގެ ބަދަލު ޓެކްސީ ޑްރައިވަރުންނަށް ލިބެންޖެހޭ ކަމަށް މީކާއީލް ގޮވާލައްވާފައި ވެއެވެ. މީގެއިތުރުން މި މުޒާހަރާގައި ހައްޔަރުކުރި ޓެކްސީ ޑްރައިވަރުން ދޫކޮޮށް، އެ ޑްރައިވަރުންގެ މުދާ އެފަރާތްތަކާއި އަނބުރާ ހަވާލުކުރުމަށްވެސް މީކާއީލް ގޮވާލައްވާފައި ވެއެވެ.
Advertisement
This content is created and paid for by advertisers and does not involve Voice Journalists
