އިލެކްޝަން ކޮމިޝަނުގެ ހުސްވެފައިވާ ރައީސް އާއި ނައިބުރައީސްކަމުގެ މަޤާމަށް ބޭފުޅުން އައްޔަނުކުރުމަށް ރައްޔިތުންގެ މަޖިލީހަށް  ރައީސުލްޖުމްހޫރިއްޔާ މިއަދު ނަންފުޅުތައް ފޮނުއްވައިފިއެވެ. 

އިލެކްޝަނުގެ ރައީސްކަމުގެ މަޤާމަށް އައްޔަނުކުރުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ފޮނުއްވެވި ނަންފުޅަކީ މިހާރުވެސް ކޮމިޝަނުގެ މެމްބަރުކަމުގެ މަޤާމުގައި ހުންނެވި މުޙައްމަދު ޒާހިދެވެ. ނައިބުރައީސްކަމުގެ މަޤާމަށް ހުށަހެޅުއްވާފައިވަނީ ސޮލާހް ރަޝީދެވެ. އޭނާއަކީ މިހާރުވެސް ކޮމިޝަނުގެ މެމްބަރެކެވެ. އިލެކްޝަނުގެ ޤާނޫނަށް އެންމެފަހުން ގެނައި އިސްލާހުގައިވާގޮތުން ކޮމިޝަނުގެ ރައީސް އަދި ނައިބުގެ މަޤާމު ކަނޑައެޅުމަށް ނަންފުޅު ހުށަހެޅުމުގެ ބާރު އޮންނަނީ ރައީސުލްޖުމްހޫރިއްޔާއަށެވެ.

އެ ދެ ބޭފުޅުންގެ ނަން މިހާރު ވަނީ ދިރާސާކުރުމަށް މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ފޮނުއްވާފައެވެ. އިެލކްޝަން ކޮމިޝަނުގެ މެމްބަރުކަމުގެ މަޤާމަށް ޒާހިދާއި ސޮލާހު އައްޔަނުކުރައްވާފައިވަނީ ހުސްވި ޖެނުއަރީމަހުގެ ތެރޭގައެވެ. ޒާހިދު ވަނީ މީގެކުރިން ހިއުމަން ރައިޓްސް ކޮމިޝަނުގެ ނައިބުރައީސްކަމުގެ މަޤާމު ފުރުއްވާފައެވެ. އަދި ސޮލާހު އެންމެފަހުން އެންމެފަހުން ފުރުއްވާފައިވަނީ ދާހިލީ ވުޒާރާގެ ޕާމަނަންޓް ސެކެޓްރީކަމުގެ މަޤާމެވެ.

Advertisement