ހަަރަދު ކުޑަކުރުމަށް ސަރުކާރުން އަޅާ ފިޔަވަޅުތަކަށް ރުހުން ހޯދުމަށް މިއަދުގެ ރައްޔިތުންގެ މަޖިލީހަށް ހުށަހަޅައިފިއެވެ.

ރައީސް ޑރ. މުހައްމަދު މުއިއްޒު މިއަދު މަޖިލީހަށް ފޮނުއްވި ސިޓީގައި ވަނީ ސަރުކާރުން ދައުލަތުގެ މާލީ ހާލަތު ރަނގަޅުކުރުމަށް ކުރިއަށް އޮތް ދެ އަހަރަާް ހުށަހަޅާ ބައެއް ކަންކަން ހިމަނުއްވާފައެވެ.

އިޤްތިޞާދީ އިސްލާހުތަކުގެ ތެރެއިން ރައީސް ޑރ. މުޙައްމަދު މުޢިއްޒު ވަނީ މުސާރަ އުނިކުރުމުގެ ބައެއް އިސްލާހުތައް ހުށަހަޅުއްވާފައެވެ.

- ސިޔާސީ ގޮތުން އައްޔަންކުރާ ހުރިހާ ފަރާތްތަކުގެ މުސާރައިން 10 އިންސައްތަ އުނިކުރުން

- ބޭންކުތައް ނުހިމަނައި ދައުލަތުގެ ވިޔަފާރިތަކުގެ މުވައްޒަފުންގެ މުސާރައިން 10 އިންސައްތަ އުނިކޮށް، ކުންފުނީގެ އިސްވެރިންގެ މުސާރަ ކެޕް 90،000 ރުފިޔާގެ ގޮތުގައި ކަނޑައެޅުން

- މިނިވަން މުއައްސަސާތަކުގެ އިސްވެރިންގެ މުސާރައިން 10 އިންސައްތަ އުނިކުރުން

- ޝަރުޢީ ދާއިރާގެ އޮފިޝަލުންނާއި ރައްޔިތުންގެ މަޖިލީހުގެ މެންބަރުންގެ މުސާރައިން 10 އިންސައްތަ އުނިކުރުން

- ރައީސްގެ އަމިއްލަ މުސާރައިން 50 އިންސައްތަ އުނިކޮށް، 100،000 ރުފިޔާ އިން 50،000 ރުފިޔާ އަށް މުސާރަ ދަށްކުރުން

މިއަދުގެ މަޖިލީހުގެ އެޖެންޑާގައި ހިމެނޭ އިތުރު ކަންތައްތަކުގެ ތެރޭގައި ޓޫރިޒަމް މިނިސްޓްރީ އެންވަޔަރަންމަންޓް މިނިސްޓްރީ އެއްކޮށްލުމާއި އެ ވުޒާރާގެ މިނިސްޓަރު ޠާރިޤު އިބްރާހިމަށް ރުހުން ހޯދުމާއި އެންޓި ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން (އީސީ) ގެ ނައިބު ރައީސް އައްޔަންކުރެއްވުމަށް ރުހުން ހޯދުން ހިމެނެއެވެ. އަދި އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ހުށަހަޅާފައިވާ އިސްލާހުގެ މަސައްކަތްވެސް ހިމެނެއެވެ.