ފުލުހުންގެ ޤާނޫނުގެ ދަށުން ޕޮލިސް ބޯޑުގެ މެމްބަރުކަމަށް ކުރިމަތިލުމުގެ ފުރުސަތު އާއްމު ފަރާތްތަކަށް ހުޅުވާލައިފިއެވެ.

މިކަމާ ގުޅިގެން މަޖިލީހުގެ އިދާރާއިން މިއަދު ބުނީ، ޢާންމު ރައްޔިތުންގެ ތެރެއިން ފުލުހުންގެ ބޯޑަށް ކުރިމަތިލާން އެދޭ ފަރާތްތަކުގެ ތެރެއިން ރައްޔިތުންގެ މަޖިލީހުން ކަނޑައަޅާ 2 (ދޭއް) މެންބަރުންގެ މަޤާމަށް ކުރިމަތިލުމުގެ ފުރުޞަތު މިއަދުން ފެށިގެން ހުޅުވާލާފައިވާކަމަށެވެ. 

ފުލުހުންގެ ޤާނޫނު ބުނާގޮތުން ޕޮލިސް ބޯޑަށް ޢައްޔަންކުރެވޭ މެންބަރުންނަކީ ފުލުހުންގެ ޚިދުމަތުގައި ވަޒީފާ އަދާކުރާ ބަޔަކު ކަމުގައި ވެގެން ނުވާނެއެވެ. ޕޮލިސް ބޯޑަށް ޢައްޔަންކުރެވޭ މެންބަރުންގެ ދައުރަކީ 4 އަހަރެވެ. 

Advertisement

ރައްޔިތުންގެ މަޖިލީހުގެ އިދާރާއިން ބުނީ، ފުލުހުންގެ ބޯޑުގެ މެންބަރުންގެ މަޤާމަށް ކުރިމަތިލުމަށް އެދޭ ފަރާތްތަކުން މިހިނގާ ފެބުރުއަރީމަހުގެ 24 ވަނަ ދުވަހުގެ މެންދުރު 12:00 ގެ ކުރިން ރައްޔިތުންގެ މަޖިލީހުގެ އިދާރާއަށް ހުށަހެޅުމަށް އެދޭކަމަށެވެ. ފުލުހުންގެ ބޯޑަށް ކުރިމަތިލާ ފަރާތްތަކުގެ ނަންތައް ދިރާސާ ކުރާނީ ސަލާމަތީ ޚިދުމަތްތަކާ ބެހޭ ކޮމިޓީންނެވެ. 

ފުލުހުންގެ ބޯޑް އެކުލެވިގެންވަނީ ޖުމްލަ 7 މެމްބަރުންގެ މައްޗަށެވެ. އޭގެ ތެރޭގައި ހިމެނެނީ ރައީސުލްޖުމްހޫރިއްޔާ އައްޔަންކުރާ 2 މެމްބަރުންނާއި ފަންނީ ދާއިރާއަކުން ތައުލީމާއި ތަޖުރިބާ ލިބިފައިވާ 3 މެމްބަރުންގެ އިތުރުން އާއްމުންގެ ފަރާތުން ދެ މެމްބަރުންނެވެ.