ބްރިޖް ހައިވޭ އެކްސިޑެންޓް ވެފައި އޮތް މީހެއްގެ ގައިމަތިން ސައިކަލުގައި ދިޔަ މީހާގެ މައްޗަށް ދައުވާ ކުރަން ޕީޖީ އޮފީހަށް ފުލުހުން ފޮނުވައިފިއެވެ.

ފުލުހުން މިއަދު ނެރުުނު ނޫސްބަޔާނެއްގައި ބުނީ ފެބްރުވަރީމަހުގެ 1 ވަނަ ދުވަހުގެ ހެނދުނު 08:11 އެހާކަށްހާއިރު ހުޅުމާލެއިން މާލެއަށް އަންނަ ވޭނުގައި ހިނގި ނުރައްކާތެރި އެކްސިޑެންޓެއްގައި މީހަކު ނިޔާވެފައިވާ މައްސަލަ ދިވެހި ފުލުހުންގެ ހިދުމަތުން ތަހުގީގު ކުރަމުން އަންނަ ކަމަށެވެ. 

މި އެކްސިޑެންޓް ހިނގާފައިވަނީ ހަލިމަގުގެ ހުޅުމާލެއިން މާލެއަށް އަންނަ ފަޅީގައި، ސީޕްލޭން ލޭންޑްކުރާ ހިސާބުގައެވެ. މި ސަރަހައްދުގައި ހިނގަމުންދިޔަ ސޯލާ ޕެނެލް މަސައްކަތާ ގުޅިގެން މަގުގެ އަރިމަތީގައި ބަހައްޓާފައި ހުރި ކޯންތަކެއްގައި ސައިކަލެއް ޖެހި ވެއްޓުނު ވަގުތު، ފަހަތުން އައި އެހެން ސައިކަލަކުން ވެއްޓިފައި އޮތް މީހާގެ ގައިގައި ޖެހި އެކްސިޑެންޓްވެފައިވާ ކަމަށް ފުލުހުން މައުލޫމާތު ދިނެވެ. 

Advertisement

އެކްސިޑެންޓްގައި އަނިޔާވިމީހާއަށް ފަރުވާދެމުންދަނިކޮށް އެދުވަހު ނިޔާވެފައިވާ ކަމަށް އައިޖީއެމްއެޗްއިން މައުލޫމާތު ދީފައި ވެއެވެ. ނިޔާވެފައިވަނީ ބަންގްލަދޭޝްގެ ރައްޔިތެއް ކަމަށްވާ ޖާވިދު ޗައުދަރީ (30އ) އެވެ. 

ފުލުހުން މި ހާދިސާގެ ސީސީޓީވީ ފުޓޭޖް ދިރާސާކުރުމުން، ޖާވިދު ދުއްވަމުންދިޔަ ސައިކަލް ކޯނުގައި ޖެހި ވެއްޓުނު ވަގުތު، ފަހަތުން އައި ސައިކަލުން އޭނާގެ ބޮލާ ދިމާލުގައި ޖެހޭ މަންޒަރު ފެންނަކަން ފާހަގަކޮށްފައި ވެއެވެ. އެހެންކަމުން، އެއްގަމު ދަތުރުފަތުރު ގާނޫނުގެ ދަށުން އެމީހާ ދުއްވި ސައިކަލު ޓޯކޮށް، ފުލުހުން ވަނީ އޭނާގެ ލައިސަންސް ހިފަހައްޓާފައެވެ. އަދި ކޯޓު އަމުރެއްގެ ދަށުން މިހާރު ވަނީ ލައިސެންސް ހިފަހައްޓާފައިވާ މުއްދަތު އިތުރުކޮށްފައެވެ. 

އެކްސިޑެންޓުގައި ނިިޔާވި މީހާގެ ގައިގައި ޖެހުނު ސައިކަލު ދުއްވި މީހާ އެކްސިޑެންޓްވުމުން އެތަނުގައި މަޑުކުރިކަން ފުލުހުން ފާހަގަކުރިއެވެ. އެ ސައިކަލު ދުއްވި ދުވެލި ދެނެގަތުމަށް ތަހުގީގުގެ ތެރެއިން މަސައްކަތްކުރަމުންދާ ކަމަށް ފުލުހުން ހާމަކުރިއެވެ. 

އެއާއެކު، މި މައްސަލައިގެ ތަހުގީގު ފުރިހަމަކޮށް، ޕީޖީ އޮފީހަށް ފޮނުވުމަށް ކުރަންޖެހޭ އެންމެހާ މަސައްކަތެއް ފުލުުހުންގެ މުއައްސަސާއިން ކުރަމުންދާ ކަމަށް ބުނެފައި ވެއެވެ.