2013 ވަނަ އަހަރުގެ ރިޔާސީ އިންތިޚާބުގެ ފުރަތަމަ ބުރާއި ދެވަނަ ބުރާއި ދެމެދު، އޭރު އޮތް އެމްޑީޕީ ސަރުކާރުން މަހުގެ އަގު 25 ރުފިޔާއަށް މަތި ކުރުމުން މަހުގެ އުފެއްދުންތައް އުފައްދާ ގިނަ ފަރާތްތައް ބަނގުރޫޓު ވެގެންދިޔަ ކަމަށް މަސްވެރިކަމާ ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ. 

މަޖިލީހުގެ މިއަދުގެ ޖަލްސާގައި ވަޒީރު މަޖިލީހަށް ހާޒިރުކޮށް، ކެންދޫ ދާއިރާގެ މެންބަރު މައުރޫފް ޒާކިރު ވަނީ، މަހުގެ ބާވަތްތައް ކައްކައި ހިއްކައިގެން، އާމްދަނީ ހޯދާ ފަރާތްތަކަށް ދެމެހެއްޓެނިވި އާމްދަނީއެއް ހޯދައިދިނުމަށް ސަރުކާރުން ކުރަމުންދަނީ ކޮން ކަމެއްތޯ ސުވާލު ކުރައްވާފައެވެ. 

އެ ސުވާލަށް ޖަވާބު ދެއްވަމުން ޝިޔާމް ވިދާޅުވީ، އެފަދަ ފަރާތްތަކަކީ މަސްވެރިކަމުގެ ސިނާޢަތް ކުރިއެރުވުމަށް މުހިންމު މަސައްކަތް ތަކެއް ކުރައްވާ ފަރާތްތަކެއް ނަމަވެސް، އެފަރާތްތަކާއިމެދު ވޭތުވެދިޔަ ހުރިހާ ސަރުކާރަކުންވެސް އަޅާލާފައި ނުވާ ކަމަށެވެ. ޚާއްސަކޮށް، މިދިޔަ ސަރުކާރުން އެއްވެސް ދިރާސާ ކުރުމެއް ނެތި މަހުގެ އަގު މަތި ކުރުމުން އެ ފަރާތްތައް ބަނގުރޫޓް ވެގެންދިޔަ ކަމަށެވެ. 

އެހެންކަމުން، މި ސަރުކާރުން ވެރިކަމަށް އައިސް، މަހުގެ އުފެއްދުން އުފައްދާ ފަރާތްތަކަށް ދިން އެންމެ ބޮޑުބހަދިޔާ އަކީ މަހުގެ އަގު 17 ރުފިޔާއަށް ދަށް ކުރުން ކަމަށް ޝިޔާމް ވިދާޅުވިއެވެ. އޭގެ ނަތީޖާއެއްގެ ގޮތުން މަސް ކައްކާ ފަރާތްތަކަށްވެސް މަސް ލިބޭނެ މަގު ތަނަވަސްވެގެން ދިޔަ ކަމަށް ވަޒީރު ވިދާޅުވިއެވެ. 

މީގެ އިތުރުން މަހުން އުފެއްދުންތައް އުފައްދާ ފަރާތްތަކާއި އުކާލާ މަހުގެ ބާވަތްތަކުން ފައިދާ ކުރުވަނިވި ޕްރޮޑަކްޓްތައް ނެރުމަށް ވޯލްޑް ބޭންކުގެ އެހީގައުި 8.3 މިލިއަން ޑޮލަރު މިހާރު ހަމަޖެހުފައިވާ ކަމަށް ޝިޔާމް ވިދާޅުވިއެވެ. ހަމައެހެންމެ މަހުގެ އުފެއްދުންތައް ބާޒާރަށް މެރުމަށް ބާރުއެޅުމުގެ ގޮތުން 1.8 މިލިއަން ޑޮލަރު ހަމަޖެހިފައިވާކަންވެސް ވަޒީރު ފާހަގަކުރެއްވިއެވެ.