މިއީ މަސްވެރިން މަސް ކިރުމަށް ކިޔުގައި ޖެހޭނެ ފަހު އަހަރު ކަމަށާއި, ސަރުކާރުން މަސްވެރިކަމުގެ ސިނާއަތު ކުރިއެރުވުމަށް ކުރަމުންދާ މަސައްކަތްތަކާއެކު މަސްވެރިކަން ރަނގަޅު ދުވަސްވަރުގައިވެސް އެއްވެސް އުނދަގުލަކާއި ނުލައި މަސްވެރިންނަށް މިސްކިރުމުގެ އިންތިޒާމް ފަހިވެގެންދާނެ ކަމުގައި މަސްވެރިކަމާބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދު ޖަލްސާގައި, ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވަނީ މަސްވެރިން ކިޔުގައި ޖެހި، 4 ނުވަތަ 5 ދުވަސް ވަންދެން މަސް ނުކިރި ތިބެންޖެހޭކަން ފާހަގަކުރައްވައި، އެކަން ހައްލު ކުރުމަށް ކުރަމުންދާ މަސައްކަތްތަކާ ގުޅޭގޮތުން ސުވާލު ކުރައްވާފައެވެ.
އެ ސުވާލަށް ޖަވާބު ދެއްވަމުން ވަޒީރު ވިދާޅުވީ، ދިވެހުރާއްޖޭގެ މަސްވެރިކަން މިހާރުވެސް ވަރަށް ރަނގަޅު ކަމަށެވެ. އެހެން ކަމަށްވުމުން، ދޮށީގެ މަސްވެރިކަމުގައި މިވަގުތު ކިޔުއެއް އެބަ އޮތް ކަމަށާއި, އެ ކިޔު އޮންނަން މެދުވެރިވި ސަބަބަކީ ވޭތުވެދިޔަ އެއްވެސް ސަރުކާރަކުން މި ކިޔު ނައްތައިލުމަށް އެއްވެސް މަސައްކަތެއް ކޮށްފައި ނުވުން ކަމަށް ޝިޔާމް ވިދާޅުވިއެވެ.
"ވޭތުވެދިޔަ ހުރިހާ ސަރުކާރުތަކަކުން މި ކިޔު ނައްތައިލުމަށް އެއްވެސް މަސައްކަތެއް ކުރެވިފައި ނެތީތީ ކިޔުގައި ދޯނިތައް އެ ތިބީ. ރަނގަޅު ވާހަކަފުޅެއް. ކިޔު ނަމްބަރު އެބަ ދެވޭ. ކިޔު ނަމްބަރު މިދެވެނީ ދޯންޏަކުން ގުޅާފަ ތިމަންނަ މެން މި އަންނަނީ އޭ ކޫއްޑޫ ބަނދަރަށް މަސްކިރަން ތިމަންނަ މެންގެ އެބަ ހުއްޓޭ 40 ޓަނު ނޫނީ 50 ޓަނު. ދެން ކޫއްޑޫއިން މި ރިޒާވް ކުރަނީ 50 ޓަނު. އެކަމަކު ބަނދަރާ ހިސާބަށް އާދެވޭއިރު ގިނަ ފަހަރު މި ހުންނަނީ 20 ޓަނު. ހުރީމަ ދެވަނަ ދޯންޏަށް ތަންކޮޅެއް އަވަހަށް ކިޔު ނަމްބަރު އެބަ ދެވޭ"
ވަޒީރު އަހުމަދު ޝިޔާމް
މިއާއެކު ޝިޔާމް ވިދާޅުވީ، މަހުގެ 30 އާ ހަަމައަށް ބައެއް ދޯނިތަކަށް ކިޔު ނަމްބަރު ދީފައި އެބަހުރި ކަމަށާއި, އެހެން ނަމަވެސް އެ ދޯނިތަކުން މިއަދު ނޫނީ މާދަމާ މަސްކިރާނެ ކަމަށް މިފްކޯއިން މައުލޫމާތު ދީފައިވާކަމަށެވެ.
ޝިޔާމް އިތުރަށް ވިދާޅުވީ، ނިމިދިޔަ ސަރުކާރުގައި މިފްކޯއަށް ގަނެފައި ހުރި ޖަޒީރާ ބޯޓުތަކުގެ އެފިށިއަންސީ ވަރަށް ދަށް ކަމަށާ، އެތަނުން ގިނަ ބޯޓުތައް ހުރީ އޮޕަރޭޝަނުން ބޭރުގައި ކަމަށެވެ. އެހެންކަމުން، ޖަޒީރާ 2 އަދި ތިނެއް އޮޕަރޭޝަނަށް ގެނައުމުގެ މަސައްކަތް ފަށާފައިވާ ކަމަށާ، ކުރިއަށް އޮތް ދެދުވަހެއްގެ ތެރޭގައި އެ ދެ ބޯޓު އޮޕަރޭޝަނަށް ގެނެވޭނެ ކަމަށް ޝިޔާމް ވިދާޅުވިއެވެ. އެ އޮޕަރޭޝަނަށް ގެނެވުމުން މިހާރު އޮތް ކިޔުއަށް ވަރަށް ބޮޑު ހައްލެއް ލިބޭނެ ކަމަށްވެސް ވިދާޅުވިއެވެ.
"އިރާދަ ކުރެއްވިއްޔާ މިއީ ކިއުގައި ޖެހޭނެ ފަހު އަހަރު. އަޅުގަނޑުމެން ސަރުކާރުގެ ޑިވެލޮޕްމަންޓް ޕްލޭންގައި ނޫނީ މިހާރު މަސްވެރިކަމުގެ ސިނާއަތުން ކުރެވޭ މަސައްކަތްތަކުން އިރާދަކުރެއްވިއްޔާ މި ކިޔު އަޅުގަނޑުމެން ނައްތާލާނަން. ނައްތާލުމަށް ފަހު މަސްވެރިންނަށް އެއްވެސް އުނދަގުލަކާއި ނުލައި ކިތަންމެ މަސްވެރިކަން ރަނގަޅަސް އިރާދަކުރެއްވިއްޔާ ކިޔުގައި ނުޖެހި މަސްކިރޭނެ ހާލަތު ހަމަޖެހިގެންދާނެ",
ވަޒީރު އަހުމަދު ޝިޔާމް
މީގެ އިތުރުން، ޝިޔާމް ވިދާޅުވީ މިދިޔަ ދެ އަހަރަށްވުރެވެސް މިއަހަރު މަސްވެރިކަން ރަނގަޅު ކަމަށެވެ. އަދި މިފްކޯގެ ކެޕޭސިޓީއަކީ ދުވާލެއްގެ މައްޗަށް 420 ޓަނު ކަމަށްވާއިރު, މި ދުވަސްވަރު މަސްވެރިކަން ރަނގަޅު ވުމުން ފުލް ކެޕޭސިޓީއަށް މިފްކޯއިން މަސް ގަންނަމުންދާ ކަމަށާއި, 450 ޓަނު ނަގަން ޖެހޭ ދުވަސް ދުވަސްވެސް ދާކަމަށެވެ.
Advertisement
This content is created and paid for by advertisers and does not involve Voice Journalists
