ދިވެހިރާއްޖޭގެ ސްކޫލްތަކުގައި ކިޔަވާ ދަރިވަރުންގެ ތުނބުޅި ބާލަން މަޖުބޫރުކުރާ ކުރުން ހުއްޓުވަން ޖެހޭ ކަމަށް ހުޅުމާލެ އުތުރު ދާއިރާގެ މަޖިލިސް މެންބަރު، ހުސެއިން ޝަރީފް ވިދާޅުވުމުން، އެއީ ރާއްޖެ ކަންދަހާރަށް ވުން ކަން ދޭހަވާފަދަ މޭރުމަކުން އެމްޑީޕީގެ ކުރީގެ ނާއިބު ރައީސް މުހައްމަދު ޝިފާޒު (ޝިއްޕެ) ވާހަކަދައްކަވައިފިއެވެ. 

ރިސޯޓުތަކާއި ހޮޓާތަކުގެ މުވައްޒަފުން ތުނބުޅި ބެހެއްޓުމާއި ބުރުގާ އެޅުން ފަދަ ކަންކަން ކުރުމަށް ހުރި ހުރަސްތައް ނައްތާލަން ގޮވާލައި މަޖިލީހަށް ހުށަހެޅި ގަރާރުގެ ބަހުސްގައި ވާހަކަ ދައްކަވަމުން މެންބަރު ހުސެއިން ޝަރީފް ވަނީ އެއްވެސް ދާއިރާއެއްގައި ނުވަތަ ސުކޫލުތަކުގައިވެސް ތުނބުޅި ބާލަން މަޖުބޫރު ނުކުރެވޭނެ ކަމަށެވެ.

"އެއްވެސް މަޖުބޫރުކަމެއް ރާއްޖޭގެ މި މާހައުލުގައި ޓޫރިޒަމް ދާއިރާ، ވަކި ދާއިރާއެއް ނޫން، ސްކޫލްތަކަށް ވަންނަ ކުދިންނަށް ވެސް މަޖުބޫރު އެބަ ކުރުވާ، އެކަން އެބަ ޖެހޭ ހުއްޓުވަން، އެ ކުދިން މިވެނި އުމުފުރާއަކަށް ހަމަ ބޮޑުވާއިރަށް އެބަ ބުނޭ، ހަމަ ކޮންމެ ދުވަހަކު އަންނަ އިރަށް ލީޑިން ޓީޗަރު ބުނާނެ އޭތް ތުނބުޅި ބާލައިގެން އާދޭ، މިކަން އެބަޖެހޭ ހުއްޓުވަން އަޅުގަނޑުމެން ގައުމުން،" ހުސެއިން ވިދާޅުވި އެވެ.

Advertisement

ހުސެއިންގެ ވާހަކައާއި ގުޅިގެން ޝިއްޕެ އެކްސްގައި ކުރެއްވި ޕޯސްޓެއްގައި ވަނީ، ”މި ފުލައިޓް ކަންދަހާރަށް ލޭންޑު ކުރުމުގެ ކުރިން ހުއްޓުވަންޖެހޭ!“ ކަމަށް ވިދާޅުވެ އެކަމަށް ފާޑުވިދާޅުވެފައެވެ.

ޝިފާޒުގެ އެ ވާހަކަ އާއި ގުޅިގެން ގިނަބަޔަކު އަންނަނީ އޭނާއަށް ފާޑުކިޔަމުންނެވެ. އެގޮތުން، ތުނބުޅި ބެހެއްޓުމާބެހޭ ގަރާރެއް އެމްޑީޕީން ހުށަހެޅިއިރު، އެކަމަށް އެމްޑީޕީގެ މެންބަރުން ފާޑުކިޔުމުން ދެފުށްދެގޮތްކަން އެނގޭ ކަމަށް އެއްބަޔަކު ބުނެފައި ވާއިރު، ގިނަ ބަޔަކު ވަނީ، އެމްޑީޕީއަށް ލާދީނީ ކިޔަނީ ލާދީނީ ވީމައޭ ބުނެފާޑުކިޔާފައެވެ. 

މީގެ އިތުރުން، ތުނބުޅި ބެހެއްޓުމަށް ފާޑުކިޔާ ޝިފާޒުގެވެސް ތުނބުޅި ހުންނަ ކަމަށާ، ސުކޫލު ދަރިވަރުންނަށް ކިޔަވައިދޭ އިސްލާމް ފޮތުގައިވެސް ތުނބުޅި ބެހެއްޓުމަކީ ސުންނަތެއްކަން ބުނެދީފައިވާ ކަން މީހަކު ވަނީ ފާހަގަކޮށްފައެވެ. 

މީގެ އިތުރުން އެމްޑީޕީން ހައްގުތަކުގެ ވާހަކަ ދައްކާއިރު، ”ހައްގު“ އޮންނަނީވެސް ވަކި ކަންކަމުގައި ކަމަށްބުނެ އެހެން ބައެއް ފަރާތްތަކުން ވަނީ ނުރުހުންފާޅުކޮށްފައެވެ.