އުޒްބެކިސްތާނުން އާޓިފިޝަލް އިންޓެލިޖެންސްގެ ދާއިރާއިން ކުރިއެރުންތައް ހޯދުމަށް ކުރިއަށްގެންދާ ޕްރޮޖެކްޓްގެ ތެރެއިން، އެގައުމުގައި ގާއިމްކުރާ ފުރަތަމަ އޭ.އައި ޑޭޓާ ސެންޓަރ ހެދުމުގެ މަސައްކަތް އިންޑިއާގެ ލާރސެން އެންޑް ޓާބްރޯ (އެލް އެންޑް ޓީ) އާއި ހަވާލުކޮށްފިއެވެ.
ވެރިރަށް ޓަޝްކެންޓްގައި ގާއިމްކުރާ މި ޑޭޓާ ސެންޓަރަކީ 10 މެގަވޮޓްގެ ޑޭޓާ ސެންޓަރެކެވެ. މި މަސައްކަތަކީ އިންޖިނިއަރިންގ، ޕްރޮކިއުމަންޓް އެންޑް ކޮންސްޓްރަކްޝަން (އީ.ޕީ.ސީ) އުސޫލުން އެލް އެންޑް ޓީ އަށް ލިބުނު، ތާރީޚީ ޕްރޮޖެކްޓެއްކަމަށް އެކުންފުނިން ބުނެއެވެ. މި ޑޭޓާ ސެންޓަރ ހެދުމަށް ނިންމާފައިވަނީ ތިމާވެއްޓާއި ރައްޓެހި ޓެކްނޮލޮޖީ ބޭނުންކޮށްގެން، އެތަނުގެ ސަބަބުން ތިމާވެއްޓަށް ކުރާ އަސަރު ވީހާވެސް ކުޑަވާނެ ގޮތަކަށް ވިސްނައިގެންކަމަށް އެލް އެންޑް ޓީ އިން ބުނެއެވެ.
އިގްތިސާދު ސިންދަފާތުކޮށް، އައިޓީ ސެކްޓަރ ކުރިއެރުވުމަށް އުޒްބެކިސްތާނު ސަރުކާރުން ގެންދަނީ ގިނަ މަސައްކަތްތަކެއް ކުރަމުންނެވެ. އެގޮތުން ކުންފުނިތަކާއި ވިޔަފާރިތައް ރަޖިސްޓްރީކުރުމަށް ފަސޭހަކޮށްދިނުންފަދަ ފިޔަވަޅުތައްވެސް އެގައުމުން އަންނަނީ އަޅަމުންނެވެ.
Advertisement
This content is created and paid for by advertisers and does not involve Voice Journalists
