ދުންފަތް ކޮންޓްރޯލް ކުރުމާ ބެހޭ ޤާނޫނުގެ ދަށުން ދިވެހިރާއްޖެއަށް އެތެރެކުރުން މަނާ އިލެކްޓްރޯނިކް ސިނގިރޭޓާއި، ވޭޕް އެތަކެތި ގެންގުޅޭ މީހުންގެ އަތުން، އަތުލުމުގެ ބާރު ތަންފީޒީ ބާރުތަކަށް ދޭގޮތަށް ޤަވާއިދު އެކުލަވާލައިފިއެވެ.

ދިވެހި ސަރުކާރުގެ ގެޒެޓްގައި މިއަދު އާއްމުކޮށްފައިވާ ދުންފަތް ކޮންޓްރޯލްކުރުމާ ގުޅޭ އާއްމު ޤަވާއިދުގައި ބުނެފައިވަނީ، ރާއްޖެއަށް އެތެރެކުރުން މަނާ އިލެކްޓްރޯނިކް ސިނގިރޭޓާއި ވޭޕްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުމެއް ބޭނުންކުރުން މަނާތަނެއްގައި ބޭނުންކުރަނިކޮށް ފެނިއްޖެނަމަ، ޤާނޫނު ތަންފީޒުކުރާ އިދާރާއަކަށް ޤާނޫނަކުން ލިބިދޭ ބާރެއްގެ ދަށުން ނުވަތަ ކޯޓު އަމުރެއްގެ ދަށުން ބަލާ ފާސްކުރުމުގެތެރޭގައި އެފަދަ އެއްޗެއް ފެނިއްޖެނަމަ އެ އެއްޗެއް ތަންފީޒީ އިދާރާގެ ބެލުމުގެ ދަށަށް ނެގިދާނޭ ކަމަށެވެ.

މި ޤަވާއިދުގައި ބުނެފަިއވަނީ އިލެކްޓްރޯނިކް ސިނގިރޭޓާއި، ވޭޕް ފަދަ މަނާކޮށްފައިވާ އެއްޗެއް ގެންގުޅެނިކޮށް ފެނިއްޖެނަމަ 2،000 ރުފިޔާއިން ޖޫރިމަނާކުރަން ވާނޭކަމަށެވެ. އަދި އެފަދަ ފަރާތަކަށް އަންގާ އެންގުމަކާ އެއްގޮތަށް އަމަލުނުކޮށްފިނަމަ 50،000 ރުފިޔާއިން ޖޫރިމަނާކުރުމުގެ ބާރުވެސް ވަނީ ދީފައެވެ. އަދި އެއީ ވިޔަފާރިކުރާ ތަނެއްނަމަ 100،000 ރުފިޔާއިން ޖޫރިމަނާކޮށް، ވިޔަފާރީގެ ހުއްދަ ބާތިލްކުރަން ހުށަހަޅަން ޖެހޭނޭކަމަށްވެސް ވަނީ ބަޔާންކޮށްފައެވެ.

މިގޮތުން ކުރާ ޖޫރިމަނާތައް ބަންދު ދުވަސްތައް ނުހިމަނައި 14 ދުވަހުގެ ތެރޭގައި ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީއަށް ދައްކަންޖެހޭނޭ ކަމަށްވެސް ވަނީ ބަޔާންކޮށްފައެވެ.

ރާއްޖޭގައި ވޭޕް ބޭނުންކޮށް އެތަކެތީގެ ވިޔަފާރިކުރުން މަނާކޮށް، ދުންފަތުގެ ވިޔަފާރި ކުރެވޭނެ އެންމެ ހަގު އުމުރަކީ 21 އަހަރު ކަމަށް ވަނީ ކަނޑައަޅާފައެވެ. ދުންފަތް ކޮންޓްރޯލް ކުރުމާއި ބެހޭ ގާނޫގައި ވާގޮތުން، އެ ގާނޫނާ ޚިލާފް ވެއްޖެ ބޮޑު ޖޫރިމަނާއެއް ދައްކަންޖެހޭއެވެ.