ރާއްޖޭގެ މާލީ ހާލަތު ހަރުދަނާ ކުރުމަށް ދިވެހި ސަރުކާރުން އަޅަމުންދާ އިސްލާހީ ފިޔަވަޅުތައް އަވަހަށް ތަންފީޒުކުރަން ޖެހޭ ކަމަށް އިންޓަނޭޝަނަލް މަނިޓަރީ ފަންޑުން ބުނެފި އެވެ.

އައިއެމްއެފް އިން މިހެން ބުނެފައިވަނީ، ރާއްޖޭގެ އިގްތިސާދީ ހާލަތު މިހާރު ވަޒަންކުރަމުންދާ އައިއެމްއެފްގެ ވަފުދެއްގެ ދަތުރުގެ ތެރެއިން، ރައްޔިތުންގެ މަޖިލީހުގެ މާލިއްޔަތު ކޮމިޓީއާއިއެކު ރޭ ބޭއްވި ބައްދަލުވުމުގައެވެ.

ސަރުކާރުން ހުށަހަޅާފައިވާ މާލީ އިސްލާހުތަކަށް ތާއީދުކުރާކަން ފާހަގަކޮށް ކުރިއަށް އޮތް އަހަރުތަކުގައި ދަރަނި އަދާކުރުމުގެ ބޮޑެތި ޒިންމާތަކެއް ރާއްޖެއަށް ކުރިމަތިވާނެ ކަމުގެ އިންޒާރު އައިއެމްއެފް އިން ދީފައިވެ އެވެ. ހަރަދުތައް ކުޑަކުރުމާއި އާމްދަނީ އިތުރުކުރުމަށް އަޅަން ނިންމާފައިވާ ފިޔަވަޅުތަކާއި ޚާއްސަކޮށް ދަރަނީގެ ގާނޫނާއި މާލީ ޒިންމާގެ ގާނޫނަށް ގެނައި އިސްލާހުތަކުގެ އިތުރުން އާސަންދަ ސިއްހީ ނިޒާމަށް ގެނައި އިސްލާހުތަކަށް އެ މުއައްސަސާއިން ތައުރީފުކުރި އެވެ.

Advertisement

މިވަގުތު ރާއްޖެއަށް ކުރިމަތިވެފައިވާ ގޮންޖެހުންތައް އުފެދިފައިވަނީ އެތައް އަހަރެއް ވަންދެން ފުނިޖެހުނު މައްސަލަތަކުން ކަމަށް އައިއެމްއެފް އިން ބުނެފައި ވެއެވެ. 

އެއާއެކު، މަޖިލީހުގެ މެންބަރުން ވަނީ މި ފިޔަވަޅުތައް ކާމިޔާބުކަމާއެކު ތަންފީޒު ކުރުމަށް އައިއެމްއެފް ފަދަ ޖަމިއްޔާތަކުގެ ތާއީދު ހިމެނޭ ގޮތަށް ބައިނަލްއަގްވާމީ އެއްބާރުލުން ދިނުމުގެ މުހިންމުކަން ފާހަގަކުރައްވާފައެވެ.

މި ބައްދަލުވުމުގައި އައިއެމްއެފްގެ ވަފުދުގެ އިސްވެރިޔާ ނިކީ ސޮޑްސްރިވިބޫން ވިދާޅުވީ މިއަހަރު ރާއްޖޭގެ އިގްތިސާދު 5 އިންސައްތައިން ކުރިއަރާނެ ކަމަށް ލަފާކުރެވޭ ކަމަށެވެ. ފަތުރުވެރިން އަންނަ މިންވަރު އިތުރުވުމާއި ވެލާނާ އިންޓަނޭޝަނަލް އެއާޕޯޓުގައި އާ ޓާމިނަލް ހުޅުވުމުގެ ސަބަބުން މި ކުރިއެރުން އަންނާނެ ކަމަށް އެ ވަފްދުން ލަފާކުރިއެވެ.