ސިފައިންނަށް ބޯހިޔާވަހިކަން ފޯރުކޮށްދިނުމަށް ކުރިއަށްގެންދިޔަ ފްލެޓް މަޝްރޫއު އާއި ސިފައިންގެ ކޯޕަރޭޓް ކުންފުނި، ސިފްކޯގެ ހާއްސަ އޮޑިޓެއް ހެދުމަށް މަޖިލީހުގެ މާލިއްޔަތު ކޮމިޓީން އޮޑިޓަރ ޖެނެރަލްއަށް އަންގަވައިފިއެވެ.

މިކަމާ ގުޅޭގޮތުން ރައްޔިތުންގެ މަޖިލީހުގެ މާލިއްޔަތު ކޮމިޓީން އިއްޔެ ވަނީ، އޮޑިޓާ ޖެނެރަލް ހުސައިން ނިޔާޒީއަށް ސިޓީއެއް ފޮނުއްވާފައެވެ. މި ސިޓީގައި މާލިއްޔަތު ކޮމިޓީން ވަނީ ސިފައިންގެ ފްލެޓް މަޝްރޫޢު ހިންގުމަށް ސިފްކޯއަށް ލިބުނު ފައިސާ އާއި މުޅި މަޝްރޫޢުއަށް ހަރަދުވި އަދަދު ދެނެގަތުމަށް އަންގާފައެވެ. މި އޮޑިޓްގައި ކޮންޓްރެކްޓަރުންނަށް ހަރަދުވި އަދަދުތަކާއި އެކިފަރާތްތަކަށް ނުދައްކައި ހުރި އަދަދުތައް ހިމެނުމަށްވެސް ވަނީ އެދިފައެވެ. 

މި ސިޓީގައި މާލިއްޔަތު ކޮމިޓީން ވަނީ އެ ރިޕޯޓްގެ މަސައްކަތް ނިންމައި މަޖިލީހުގެ އިދާރާއަށް ފޮނުވޭނެ ތާރީހެއް އަންނަ އާދިއްތަދުވަހުގެ 12 ގެ ކުރިން އެންގުމަށްވެސް އެދިފައެވެ.

Advertisement

މަޖިލީހުގެ މާލިއްޔަތު ކޮމިޓީން ސިފްކޯ ފްލެޓްތަކުގެ ހާއްސަ އޮޑިޓެއް ހެދުމަށް އަންގާފައިމިވަނީ ފުލުހުންގެ ފްލެޓް މަޝްރޫޢޭުއާ ގުޅޭ ބޮޑެތި މައްސަލަތަކެއް އޮޑިޓަރ ޖެނެރަލް ނެރުއްވި ރިޕޯޓްގައި ފާހަގަކޮށްފައި ވަނިކޮށެވެ. ފުލުހުންނަށް ޚާއްސަކޮށްގެން ހައުސިން ޔުނިޓުތަކެއް އަޅަން 2013 ވަނަ އަހަރު ޕޮލިސް ކޯޕަރޭޓިވް ސޮސައިޓީ (ޕޮލްކޯ)އާ ހާވަލުކުރުމުން އެ މަޝްރޫއަށް އެއް ބިލިއަނަށް ވުރެ ގިނަ ރުފިޔާ ޚަރަދުވެފައިވާކަމަށް އޮޑިޓަރ ޖެނެރަލް ނެރުއްވި ރިޕޯޓްގައި ވަނީ ބުނެފައެވެ. 

ފުލުހުންގެ ހައުސިން ޕްރޮޖެކްޓް، ބްލޫސް ހައުސިންއާ ގުޅިގެން އާއްމުކޮށްފައިވާ އޮޑިޓުގައި ބުނީ އެ މަޝްރޫއުއަށް މިހާތަނަށް 1.06 ބިލިއަން ރުފިޔާ ހަރަދުކޮށްފައިވާ ކަމަށާ އެއީ، އަކަފޫޓަކަށް 1،851 ރުފިޔާ ކަމަށެވެ. އެހެން ނަމަވެސް އާންމު ގޮތެއްގައި ކޮންސްޓްރަކްޝަން މަސައްކަތް ކޮށްދޭ އަމިއްލަ ކުންފުނިތަކުން އަކަފޫޓަކަށް 1،300 ރުފިޔާއާއި 1،500 ރުފިޔާއާ ދެމެދުގެ އަގެއްގައި އެ ފަދަ ކޮންސްޓްރަކްޝަން މަސައްކަތް ކޮށްދޭ ކަމަށް ރިޕޯޓްގައިވެއެވެ. އަދި އެ ރޭޓުތަކަށް ބަލާނަމަ، އެ މަޝްރޫއުގެ އަގަށް ޖެހެނީ 745.3 މިލިއަން ރުފިޔާ ކަމަށާ އެންމެ ބޮޑުވެގެން ވެސް 859.9 މިލިއަން ރުފިޔާއަށް އެ މަޝްރޫއު ނިންމާލެވޭނެ ކަމަށް އޮޑިޓް ރިޕޯޓުގައި ފާހަގަކޮށްފައިވެއެވެ.