ރައްޔިތުން މަޖިލީހުގެ ފުރަތަމަ ދައުރު ކުރުކޮށްލުމަށް ނިންމައި ކުރިއަށްއޮތް ރޯދަމަހު މަޖިލިސް ޗުއްޓީއަށްދާން މަޖިލީހުގެ އާއްމު ކޮމިޓީން ފާސްކޮށްފިއެވެ.

މި އިސްލާހް ހުށަހެޅުއްވީ މާފަންނު ދެކުނު ދާއިރާގެ ސަރުކާރު ހިންގާ ޕީއެންސީއަށް ނިސްބަތްވާ މެމްބަރު އަބްދުﷲ ރިފާއު (ބޮޗޭ)އެވެ. އޭނާ ހުށަހެޅުއްވީ މިހިނގާ މަޖިލީހުގެ ފުރަތަމަ ދައުރު މިމަހުގެ ނިޔަލަށް ނިންމާލުމަށެވެ. އަދި ދެވަނަ ދައުރު އޭޕްރިލްމަހުން ފެށިގެން ޖުލައިމަހުގެ ނިޔަލަށް ކުރިއަށްގެންދާ ގޮތަށެވެ. އޭގެ އިތުރުން ތިންވަނަ ދައުރު ސެޕްޓެމްބަރުމަހުން ފެށިގެން ނޮވެމްބަރުމަހަށް ގެންދިއުމަށް ބޮޗޭ ވަނީ އިސްލާހްގައި ހިމަނާފައެވެ.

ކޮމިޓީގައި މި އިސްލާހާ ގުޅޭގޮތުން ވާހަކަދެއްކުމަށްފަހު އެންމެފަހުން ނިންމާފައިވަނީ އިސްލާހް ފާސްކުރާށެވެ. މަޖިލީހުގެ އާއްމު ކޮމިޓީގެ ރިޔާސަތު ބެލެހެއްޓެވި މުގައްރިރު ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު ވިދާޅުވީ މި އިސްލާހް ހުށަހެޅުމުގެ ސަބަބަކީ ރޯދަމަހު ވީހާވެސް ގިނަވަގުތު އަޅުކަމައިގެން އުޅުމަށް މަގުފަހިކޮށްދިނުންކަމަށެވެ.

Advertisement

ނަމަވެސް އެވާހަކަތަކަށް ރައްދުދެއްވަމުން އެމްޑީޕީއަށް ނިސްބަތްވާ، ކަނޑިތީމު ދާއިރާގެ މެންބަރު އަމީން ފައިސަލް ވަނީ އިސްލާހާ ދެކޮޅު ހައްދަވާފައެވެ. އޭނާ ވިދާޅުވީ ރޯދަމަހު އާމްދަނީ ހޯދަން މަސައްކަތްކުރުމަކީ މައްސަލައެއް ނޫންކަމަށާއި އިސްލާމްދީނުގައި ބޮޑެތި ހަނގުރާމަތައްވެސް ރޯދަމަހު ކޮށްފައިވާކަން އެނގެން އޮންނަ ކަމަާށެވެ. އެގޮތުން ވަގުތު ކުރުކޮށްގެން ނަމަވެސް މަޖިލިސް ކުރިއަށްގެންދަން ފެންނަކަމަށް އޭނާ ވަނީ ފާހަގަކުރައްވާފައެވެ.

އަމީން ފައިސަލްގެ ވާހަކައަށް ސަރުކާރަށް ނިސްބަތްވެ ވަޑައިގަންނަވާ މެމްބަރުން ދެކޮޅު ހެއްދެވިއިރު، މެމްބަރުން ވިދާޅުވީ އެގޮތަށް ބަދަލު ގެނައިނަމަވެސް މަޖިލީހުގެ މަސައްކަތް ކުރަންޖެހޭ ދުވަސްތައް ނުގެއްލޭނެ ކަމަށެވެ. މި މައްސަލަ އެންމެފަހުން ފާސްކުރީ ކޮމިޓީގައި ތިއްބެވި 7 މެމްބަރުންގެ ތެރެއިން 6 މެމްބަރުންގެ ވޯޓުންނެވެ.