ރަޝިޔާ ގުޅިގެން އިންޑިއާގައި އުފައްދާ ބްރާމޯސް މިސައިލް ސިސްޓަމްތަކެއް ގަތުމަށް ބޭރު ގައުމަކާއެކު އިންޑިއާ ސަރުކާރުން ވާހަކަ ދައްކަމުން އަންނަކަމަށް އިންޑިއާގެ ބައެއް ނޫސްތަކުން ބުނެފިއެވެ.
ފިލިޕީންސްއަށް މިހާރުވެސް ބްރާމޯސް މިސައިލް ވިއްކާފައިވާއިރު، މި މިސައިލް ސިސްޓަމް ވިއްކާ ދެވަނަ ގައުމަކީ ކޮބައިކަމެއް އަދި އިންޑިއާ ސަރުކާރަކުން ހާމައެއް ނުކުރެއެވެ. އިންޑިއާގެ މީޑިއާ ރިޕޯޓްތައް ބުނާ ގޮތުން އެގައުމަކާއެކު ސޮއިކުރާނީ މިއަހަރުގެ ފަހުކޮޅުއެވެ. އިންޑިއާއިން މިހާރުވެސް ޔޫ.އޭ.އީ، ސަޢޫދީޢަރަބިއްޔާ، މިސްރު، ވިއެޓްނާމް އަދި އިންޑޮނީޝިއާއާއެކު ބްރާމޯސް މިސައިލް ވިއްކުމުގެ މަޝްވަރާތަކެއް ކުރިއަށްގެންދެއެވެ. ބްރާމޯސް މިސައިލްތަކުގެ އެއްގަމާއި ވަޔާއި ކަނޑުގެ މަގުން އުދުއްސާލެވޭ ޚާއްސަ ވައްތަރުތައް ހުރިއިރު، އިންޑިއާއިން މިހާރު ބްރާމޯސް ވިއްކުމަށް މަޝްވަރާކުރާ ގައުމާއެކު މަޝްވަރާކުރަނީ އެއްގަމު މަގުން އުދުއްސާލެވޭ ބްރާމޯސް ވިއްކުމަށެވެ.
ހަތިޔާރު އުފައްދާ ދުނިޔޭގެ ބާރުގަދަ ގައުމުތަކުން އެކި ސަރަހައްދުތަކުގައި ހިނގަމުންދާ އެކި ހަމަނުޖެހުންތަކުގައި ބައިވެރިވަމުންދާތީ، އަދި ދުނިޔޭގެ ސިޔާސީ މަސްރަހާއި ނިޒާމަށް އަންނަމުންދާ ބަދަލުތަކާއެކު، ވަކި ފަރާތަކަށް ނުޖެހި އޮތް އިންޑިއާއަށް އަސްކަރީ ސާމާނު ވިއްކުމަށް ފަސޭހަ ދޮރެއް ވަނީ ހުޅުވިފައެވެ.
ބްރާމޯސްއަކީ އަޑަށްވުރެ ތިން ގުނަ ބާރަށް ދަތުރުކުރާ ގޮތަށް އުފައްދާފައިވާ ހަމައެކަނި ކްރޫޒް މިސައިލެވެ.
Advertisement
This content is created and paid for by advertisers and does not involve Voice Journalists
