މި އަހަރުގެ މިހާތަނަށް ތިންލައްކަ ފަތުރުވެެރިން ރާއްޖެއަށް ޒިޔާރަތްކޮށްފިއެވެ.

ޓޫރިޒަމް މިނިސްޓްރީ ނެރެ އާއްމުކޮށްފައިވާ ރާއްޖެއަށް ޒިޔާރަތްކުރި ފަތުރުވެރިންގެ ތަފާސްހިސާބުތަކަށް ބަލާއިރު، ޖެނުއަރީމަހުން ފެށިގެން މިހިނގާ ފެބުރުއަރީމަހުގެ 12 ވަނަ ދުވަހުގެ ނިޔަލަށް ރާއްޖެއަށް ވަނީ، 303،447 ފަތުރުވެރިން ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު 8.7 އިންސައްތައިގެ ކުރިއެރުމެކެވެ. މިދިޔަ އަހަރުެ މި މުއްދަތުގެ ތެރޭގައި ރާއްޖެއަށް ޒިޔާރަތްކޮށްފައިވަނީ، 86،849 ފަތުރުވެރިންނެވެ.

ޓޫރިޒަމް މިނިސްޓްރީން އާންމު ކުރި މައުލޫމާތަށް ބަލާއިރު މިއަހަރު ޖެނުއަރީމަހު ރާއްޖެއަށް، 214،863 ފަތުރުވެރިން ރާއްޖެއަށްޒިޔާރަތްކުރިއެވެ. އަދި ފެބުރުއަރީމަހު 86،849 ފަތުރުވެރިން ރާއްޖެއަށް ޒިޔާރަތްކޮށްފައި ވެއެވެ. އެގޮތުން މިހާރު ދުވާލެއްގެ މައްޗަށް 8053 ފަތުރުވެރިން އެވްރެޖްކޮށް ރާއްޖެއަށް ޒިޔާރަތްކުރާ ކަމަށް މި ތަފާސްހިސާބުތަކުން ދައްކައެވެ. މި މަހު އެންމެ ގިނަ ފަތުރުވެރިން ޒިޔާރަތްކޮށްފައިވަނީ ފެބްރުވަރީ 1 ވަނަ ދުވަހުއެވެ. އެ ދުވަހު 9495 ފަތުރުވެރިން ރާއްޖެއަށް ޒިޔާރަތްކޮށްފައި ވެއެވެ.

Advertisement

މިއަހަރު ޒިޔާރަތްކުރި 300،00 އެއްހާ ފަތުރުވެރިންގެ ތެރެއިން އެންމެ ގިނަ މީހުން މަޑުކޮށްފައިވަނީ ރިސޯޓްތަކުގައެވެ. އެގޮތުން 210,591 ފަތުރުވެެރިން މިއަހަރު ތެރޭ ރިސޯޓްތަކަށް ޒިިޔާރަތްކޮށްފައި ވެއެވެ. 77650 ފަތުރުވެރިން ގެސްޓްހައުސްތަކުގައި މަޑުކޮށްފައިވާއިރު ހޮޓާތަކުގައި 8077 ފަތުރުވެރިން މަޑުކޮށްފައި ވެއެވެ. 6,982 ފަތުރުވެރިން ސަފާރީ އުޅަނދުތަކުގައި މަޑުކޮށްފައިވާއިރު 147 މީހުން އެހެނިހެން ތަންތަނުގައި ދުވަސް ހޭދަކޮށްފައިވާ ކަމަށް ތަފާސް ހިސާބުން ދައްކައެވެ. 

މިއަހަރު އެންމެ ގިނަ ފަތުރުވެރިން ޒިޔާރަތްކުރި ސޯސް މާކެޓަކީ ޗައިނާއެވެ. ޗައިނާ މާކެޓުން 50،979 ފަތުރުވެރިން އައިސްފައިވާއިރު، ދެވަނައިގައި އޮތީ 28،977 ފަތުރުވެރިންނާއެކު ރަޝިޔާއެވެ. ތިން ވަނައަށް 27،917 ފަތުރުވެރިންނާއިއެކު ތިންވަނައިގައި އިނގިރޭސިވިލާތް އޮތްއިރު 27،901 ފަތުރުވެރިންނާއެކު އިޓަލީ އޮތީ މާކެޓްގެ ހަތަރުވަނައިގައެވެ.

މިދިޔަ އަހަރާ އަޅާބަލާއިރު ފަތުރުވެރިކަމުގެ ގަދަ ތިން މާކެޓަށް ބަދަލެއް ނާންނައިރު، އިޓަލީމާކެޓް ވަނީ ޖަރުމަނު ފަހަތަށް ޖައްސާލައި މިއަހަރުގެ ހަތަރު ވަނައަށް އެންމެ ބޮޑު މާކެޓުގެ މަޤާމު ހޯދާފައެވެ.

މިދިޔަ އަހަރު ދިވެހި ސަރުކާރުން ކަނޑައެޅި 2 މިލިއަން ފަތުރުވެރިން ގެނައުމުގެ އަމާޒު ހާސިލުކުރެވިފައިވާއިރު މިއަހަރު ޓޫރިޒަމް މިނިސްޓްރީ އިން ވަނީ 2.3 މިލިއަން ފަތުރުވެރިން ރާއްޖެ ގެނައުމަށް އަމާޒު ހިފާފައެވެ. މި އަަމާޒު ހާސިލުކުރުމަށް މިއަހަރު ތެރޭ ފަތުރުވެރިކަން ޕްރޮމޯޓް ކުރުމަށް ތަފާތު ހަރަކާތްތައް ސަރުކާރުން ރާވާފައި ވެއެވެ.