އެސްޓީއޯއިން ރަމަޟާންމަހަށް ފިޔާގެނެސް އަގުހެޔޮކޮށް ފިޔާވިއްކަން ފަށައިފިއެވެ.

ބާޒާރުގައި މިވަގުތު ފިިޔާ ކިލޯއެއްގެ އަގު އުޅެނީ 30 ރުފިޔާ އާއި 20 ރުފިޔާއާ ދެމެދުގެ އަގުތަކެއްގައެވެ. އެސްޓީއޯއިން ފިޔާ ކިލޯއެއް ވިއްކަމުންދަނީ، 16 ރުފިޔާއަށެވެ  އެސްޓީއޯ އިން ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނ، އެކުންފުނިން ގެނައި ފިޔާ ޝިޕްމަންޓް ބާޒާރަށް ނެރެ ވިއްކަން ފަށާފައިވާކަމަށެވެ. 25 ކިލޯގެ ފިޔާ ބަސްތާއެއްގެ އަގު އުޅެނީ 350 ރުފިޔާއަށް ކަމަށް އެސްޓީއޯ އިން ބުނެފައި ވެއެވެ. އަދި 10 ބަސްތާއަށް ވުރެ ގިނައިން ގަންނަ ނަމަ، ބަސްތާއެއް 340ރ. އަށް ލިބޭނެ ކަމަށް އެސްޓީއޯއިން ބުންޏެވެ.

އެސްޓީއޯގެ ފިހާރަތަކުން މިހާރު ހެޔޮކުރި އަގުގައި ފިޔާ ލިބެން ހުންނާނޭކަމަށް އެކުންފުނިން ބުނެއެވެ.

Advertisement

މިއަހަރުގެ ރަމަޟާން މަހަށް ބޭނުންވާ މުދާ ފަސޭހަކަމާއެކު ލިބޭނެ ގޮތް ހަމަޖެއްސުމަށް އެސްޓީއޯއިން ވަނީ ކުރީ އަހަރުތަކެކޭ އެއްފަދައިން މިފަހަރުވެސް ތައްޔާރުވެފައެވެ. އެގޮތުން ބާޒާރުގައި ކާށީގެ އަގު ބޮޑުވާތީވެ އެކުންފުނިން ވަނީ ކާށިވެސް އެތެރެކޮށް ހެޔޮއަގައި ވިއްކުމަށް ނިންމާފައެވެ.

ކާށި ބަސްތާތަކެއްގެ ފޮޓޯ---ވޮއިސް

އެސްޓީއޯއިން އެތެރެކުރި ފުރަތަމަ ބެޗްގެ ކާށި މިހާރު ވަނީ އިންޑިއާއިން ރާއްޖެއަށް ގެނެސްފައެވެ. އެސްޓީއޯއިން ބުނީ މިއަދުން ފެށިގެން ޕީޕަލްސް ޗޮއިސް މެދުވެރިކޮށް ވިއްކަން ފަށާނޭ ކަމަށެވެ. އެސްޓީއޯއިން މިފަހަރު ކާށި ވިއްކުމަށް ކަނޑައަޅާފައިވާ އަގަކީ 5 ރުފިޔާއެވެ. 5 ރުފިޔާއަށް އެސްޓީއޯއިން ކާށި ވިއްކަން ނިންމާފައިވާއިރު މިދިޔަ އަހަރުގެ ރޯދަމަހު ބާޒާރުމަތީގައި ކާށީގެ އަގު ހުރީ ގާތްގަނޑަކަށް 15 ރުފިޔާގައެެވެ. 

މީގެ އިތުރުން އެސްޓީއޯއިން ވަނީ ހަތަރު ކެޓެގެރީ އަކަށް ބަހާލެވިގެން ކާބޯތަކެތި އެތެރެކުރުމަށް ތައްޔާރުވެފައެވެ. އެއީ:

އަސާސީ ކާބޯތަކެތި:  ފިޔާ، ބިސް އަލުވި، ކާށި، ކަދުރު

ތާޒާ ތަރުކާރީ އަދި މޭވާ: ލުނުމެދު، އިނގުރު، ލައިމް، ކެރެޓް، އޮރެންޖް، ކެބެޖް، މިރުސް، ފޭރު، ކަރާ، އަނބޫ، ޕެޝަންފުރުޓް، ކިއުކަންބާ

ޕްރޮސެސްޑް ކާނާ : ނެސްލޭ ކުރީމް، ކޮކޯ ޕައުޑަރ، ބޭކެޓް ބީންސް، ގެރިކިރު ދަޅު

ކެއްކުމަށް ބޭނުންކުރާތަކެތި:  ސަންފްލާވަރ އޮއިލް، ވެޖިޓަބަލް އޮއިލް، ބާސްމަތި ހަނޑޫ