ޗައިނާއާއިއެކު ދިވެހި ސަރުކާރުން ހަދާފައިވާ ފްރީ ޓްރޭޑް އެއްބަސްވުމުގެ ދަށުން ޗައިނާއިން 1 ބިލިއަން ރުފިޔާގެ މުދާ ރާއްޖެއަށް އިމްޕޯޓްކޮށްފައިވާ ކަމަށް އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވެއްޖެއެވެ.

މިނިސްޓަރ މިހެން ވިދާޅުވީ ޕީއެސްއެމްއާއި ރައީސް އޮފީހުން އިންތިޒާމްކުރި "އަހާ" ސިލްސިލާގެ ދަށުން ރޭ ބޭއްވި 4 ވަނަ ފޯރަމްގައި ވާހަކަދައްކަވަމުންނެވެ. 

މި ފޯރަމްގައި ވާހަކަދައްކަވަމުން މިނިސްޓަރ ވިދާޅުވީ ފަހަކަށް އައިސް އިމްޕޯޓް ޑިއުޓީގެ އާމްދަނީ ދަށްވުމަކީ އެފްޓީއޭއާ ގުޅުމެއް ނެތް ކަމެއް ކަމަށެވެ. އޭނާ ވިދާޅުވީ ޗައިނާއިން އިމްޕޯޓްކުރާ މުދަލުގެ ޖުމްލަ އަގު ގާތްގަނޑަކަށް 340 މިލިއަން ރުފިޔާގައި ހުރިއިރު، އެފްޓީއޭ އިން ލިބުނު ހަގީގީ ޑިއުޓީގެ ފައިދާއަކީ 23 މިލިއަން ރުފިޔާ ކަމަށެވެ. އެއީ ޖުމްލަ އިމްޕޯޓްގެ އެންމެ އެއް ޕަސެންޓްކަން މިނިސްޓަރ ފާހަގަކުރެއްވިއެވެ. 

ފްރީ ޓްރޭޑްއާއި މެދު ބައެއް ފަރާތްތަކުގެ ހިޔާލު ތަފާތުވިޔަސް، މި އެއްބަސްވުމަކީ ވިޔަފާރީގެ ހުރަސްތައް ކުޑަކުރުމަށް އެހީތެރިވެދޭ އަދި އިގްތިސާދީ ކުރިއެރުން ފަހިކޮށްދޭ އެއްބަސްވުމެއް ކަންވެސް އޭނާ ފާހަގަކުރެއްވި އެވެ.

2020 ވަނަ އަހަރުގެ މެއި މަހުގެ 1 ވަނަ ދުވަހުން ފެށިގެން އަމަލުކުރަން ފެށި މޯލްޑިވްސް-ޗައިނާ އެފްޓީއޭގެ ދަށުން ރާއްޖެއިން ޗައިނާގެ އިމްޕޯޓްގެ 70 އިންސައްތަ ޑިއުޓީ އުވާލާފައި ވެއެވެ. މި އަހަރުގެ ފުރަތަމަ ދުވަހުން ފެށިގެން ޗައިނާއަށް ބޭރުކުރާ ރާއްޖޭގެ އެކްސްޕޯޓްގެ ގާތްގަނޑަކަށް 95 އިންސައްތައިން ނަގާ ޓެރިފް ވެސް އުވާލާފައި ވެއެވެ. މީގެ އިތުރުން ކުރިއަށް އޮތް ފަސް އަހަރު ތެރޭގައި ޗައިނާގެ އިމްޕޯޓްތަކުން ޑިއުޓީ މައާފުކުރުން 20 އިންސައްތަ އިތުރުވާގޮތަށް އެއްބަސްވެފައި ވެއެވެ.

ކުރީގެ ރައީސް އަބްދުﷲ ޔާމީން އަބްދުލް ގައްޔޫމް ޗައިނާއަށް ކުރެއްވި ދަތުރުފުޅުގައި 2014 ވަނަ އަހަރު ފުރަތަމަ ސޮއިކުރެއްވި މި އެއްބަސްވުން 2018 ވަނަ އަހަރަށް ފަހު ތަންފީޒު ކުރުން ލަސްވި ނަމަވެސް 2017 ވަނަ އަހަރު ރައްޔިތުންގެ މަޖިލީހުން މި އެއްބަސްވުން ތަސްދީގުކުރި އެވެ.