ފިލިޕީންސްއާއެކު އެމެރިކާގެ އަސްކަރިއްޔާއިން ކުރިއަށްގެންދާ ތަމްރީނުތަކަކީ އަތުވެދާނެ ހަމަލާއަކުން ރައްކާތެރިވުމަށް ތައްޔާރުވުމަށް ތިބުމަށް ބާއްވާ ތަމްރީނުތަކެއް ކަމަށް އެމެރިކާއިން ބުނެފިއެވެ.

އެމެރިކާއިން މިފަދައިން ބުނީ، ފިލިޕީންސްއާއެކު ބާއްވާ ތަމްރީނުތަކުގެ ބޭނުމަށް އެމެރިކާގެ ޓައިފޮން މިސައިލް ސިސްޓަމްތަކެއް ފިލިޕީންސްގައި ވަގުތީ ގޮތުން ބެހެއްޓުމާ ގުޅިގެން، ޗައިނާއިން އެކަމާ ނުރުހުން ފާޅުކުރުމުންނެވެ. އެމެރިކާގެ މިސައިލް ސިސްޓަމްތައް ފިލިޕީންސްއިން ބޭރުކުރުމަށް، ޗައިނާގެ ދިފާޢީ ވުޒާރާއިން ފިލިޕީންސްގެ ސަރުކާރުގައި ހުކުރު ދުވަހު އެދިފައިވެއެވެ.

އެމެރިކާއިން ބުނަނީ ފިލިޕީންސްގައި އެގައުމުގެ މިސައިލް ސިސްޓަމްތައް ބެހެއްޓީ، ޙަމަލާއެއް އަތުވެދާނެކަމުގެ ބިރު ބޮޑުވެފައިވާތީ، އެކަމަށް އެމެރިކާއާއި ފިލިޕީންސްގެ އަސްކަރިއްޔާ ތަމްރީނުކުރުމަށް ކަމަށެވެ. އެހެންނަމަވެސް، ޗައިނާއިން އެކަން ދެކެނީ ޗައިނާއަށް ބިރު ދެއްކުމުގެ އަމަލެއްގެ ގޮތުގައެވެ. އެމެރިކާއާއި ފިލިޕީންސް ގުޅިގެން ކުރިއަށްގެންދާ ތަމްރީނުތަކަކީވެސް ޗައިނާއިން އެކަމާ ނުރުހުން ފާޅުކޮށް، ކަންބޮޑުވާ ކަންތައްތަކެކެވެ. އެ ތަމްރީނުތަކުގައި ބޭނުންކުރުމަށް ޓައިފޮން މިސައިލްތައް ގެނައުމަކީ ޗައިނާގެ ނުރުހުން އިތުރުވި ކަމެކެވެ.