ރާއްޖޭގެ އެންމެ ބޮޑު ދެ މިސްކިތުގައި އިމާމުވެ ތަރާވީސް ކުރުމުގައި ދިވެހި ޒުވާނުން ފެނުމަކީ ކޮންމެ ދިވެއްސަކު އެކަމާ އުފަވާނެ ކަމެެއް ކަމަށް ޕީސް ފައުންޑޭޝަންގެ އިސް ބޭފުޅެއް ކަމަށްވާ މުހައްމަދު ސޮބާހް (ޗޭ) ވިދާޅުވެއްޖެ އެވެ.
ސޮބާހަކީ މޯލްޑިވްސް ސާފިން އެސޯސިއޭޝަންގެ ވެސް ރައީސެވެ. އޭނާ ނިސްބަތްވާ ޕީސް ފައުންޑޭޝަނަކީ ދީނީ މައުލޫމާތު ފެތުރުމުގައި އިސް ދައުރެއް އޮތް ޖަމިއްޔާ އެކެވެ.
ފޭސްބުކުގައި ކުރެއްވި ޕޯސްޓެއްގައި ސޮބާ ވިދާޅުވީ ފަހަކަށް އައިސް މިސްކިތްތަކުގެ މިންބަރުތަކުން ދިވެހި ނޫކަށި ފުރައިގެ ޒުވާނުން ހުތުބާ ކިޔާ އަޑު ގުގުމާލާ ހިނދު އޭނާއަށް ސިފަކޮށްދޭން ދަތި އިހުސާސުތަކެއް ކުރެވޭ ކަމަށެވެ. ސޮބާ ވިދާޅުވި ގޮތުގައި ވެރިރަށުގެ ބޮޑު ދެ މިސްކިތުގައި އިމާމުވެ ތަރާވީސް ކުރުމުގައި ދިވެހި ޒުވާނުން ފެނުމަކީ ކޮންމެ ދިވެއްސަކު އެކަމާ އުފަވާނެ ކަމެކެވެ.
އޭނާ ވަނީ އެ މަސައްކަތުގެ ފަހަތުގައި އޮތް މިނިސްޓްރީ އޮފް އިސްލާމިކް އެފެއާޒްގެ މިނިސްޓަރާއި މުވައްޒިފުންގެ މަސައްކަތް ފާހަގަ ކުރަައްވާފަ އެވެ.
ޒުވާން ހަތީބުން ތަމްރީނުކުރުމަށް މި ސަރުކާރުން ވަރަށް ބޮޑު އިސްކަމެއް ދެއެވެ. ނަތީޖާއެއްގެ ގޮތުން ކުރު މުއްދަތެއްގެ ތެރޭގައި 300އެއްހާ ޒުވާން ހަތީބުން ވަނީ ތަމްރީނު ކޮށްފަ އެވެ. އެ ޒުވާނުންގެ ތެރޭގައި ވަރަށް ރީތިކޮށް ބަންގި ގޮވާ ހުތުބާ ދޭ ހަތީބުން ހިމެނެ އެވެ.
Advertisement
This content is created and paid for by advertisers and does not involve Voice Journalists
