މިއަހަރު ރާއްޖެއިން ހައްޖަށްދާ މީހުން އުފުލުން ގައުމީ އެއާލައިން މޯލްޑިވިއަންއާ ހަވާލު ކޮށްފި އެވެ.
އެ ނިންމުމާއެކު މޯލްޑިވްސް ހައްޖު ކޯޕަރޭޝަނާއި ގައުމީ އެއާލައިން އިން ވަނީ އެއްބަސްވުމެއްގައި ސޮއިކޮށްފަ އެވެ.
އިސްލާމީ މަރުކަޒުގެ ޖަލްސާ ކުރާ މާލަމުގައި އޮތް ރަސްމިއްޔާތެއްގައި މި އެއްބަސްވުމުގައި ހައްޖު ކޯޕަރޭޝަންގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓާ މުހައްމަދު ޝަކީލެވެ. މޯލްޑިވިއަންގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓާ އިބްރާހިމް އިޔާސެވެ.
މިއަދު އޮތް ރަސްމިއްޔާތުގައި ވާހަކަ ދައްކަވަމުން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ އަހަރުތަކެއް ފަހުން ދިވެހި ހާޖީން، ދިވެހިންގެ އަމިއްލަ އެއާލައިނެއްގައި ހައްޖަށް ދިއުމުގެ ފުރުސަތު ލިބިފައިމިވަނީ ރައީސް ޑރ. މުހައްމަދު މުއިއްޒުގެ ހިކްމަތްތެރި ސިޔާސަތުތަކުގެ ސަބަބުން ކަމަށް ވިދާޅުވެފަ އެވެ. އެ ފުރުސަތު ލިބުނީ ގައުމީ އެއާލައިނަށް އައިސްފައިވާ ބޮޑު ކުރިއެރުމުގެ ސަބަބުން ކަމަށް ވެސް މިނިސްޓަރު ވިދާޅުވި އެވެ.
މިއަދު ސޮއިކުރެވުނު މި އެއްބަސްވުމުގެ ދަށުން މިއަހަރު ރާއްޖެއިން ހައްޖަށް ދަތުރުކުރާ ހާޖީންގެ 50 އިންސައްތަ މީހުން އުފުލާނީ މޯލްޑިވިއަން އިންނެވެ.
މީގެ ކުރީން ދިވެހި ހާޖީން ހައްޖުގެ އަޅުކަމަށް ދަނީ ސައުދީ އެއާލައިންނާ ބައެއް ބޮޑެތި އެހެން އެއާލައިންތަކުންނެވެ.
Advertisement
This content is created and paid for by advertisers and does not involve Voice Journalists
