ދިވެހިރާއްޖެއިން އިންޑިއާއަށް ކަނޑައެޅުއްވި ސަފީރު އައިޝަތު އަޒީމާ، އެކަމަނާގެ ސަފީރުކަމުގެ ފަތްކޮޅު އިންޑިއާގެ ރައީސް ދުރޫޕަދީ މުރުމޫއާ މިއަދު އަރުވައިފިއެވެ.
ސަފީރުކަމުގެ ފަތްކޮޅު އެރުވުމުގެ ރަސްމިއްޔާތު ބާއްވާފައިވަނީ އިންޑިއާގެ ވެރިރަށް ނިއުދިއްލީގައި ހުންނަ ރިޔާސީ ގަނޑުވަރު "ރާސްތްރަޕަތީ ބަވަން" ގައެވެ.
ފަތްކޮޅު އެރުވުމުގެ މި ރަސްމިއްޔާތުގައި އިންޑިއާގެ ރައީސް ދުރޫޕަދީ ވަނީ ރާއްޖޭގެ ސަފީރު އަޒީމާއަށް ހޫނު މަރުހަބާއެއް ދަންނަވައި ތަހުނިޔާ ވިދާޅުވެފައެވެ. މި ބައްދަލުވުމުގައި ސަފީރު އަޒީމާ ވަނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ފަރާތްޕުޅުންނާއި ދިވެހި ރައްޔިތުންގެ ފަރާތުން ހެޔޮއެދުމާ ތަހުނިޔާ އިންޑިއާގެ ރައީސް އާއި އެޤައުމުގެ ރައްޔިތުންނަށް އަރުވާފައެވެ.
އަދި ސަފީރު ވަނީ އިންޑިއާއިން އެކި ރޮނގުރޮނގުން ރާއްޖެއަށް ވަމުންގެންދާ އެހީތަކަށް ޝުކުރުއަދާކުޮށްފައެވެ. މީގެ އިތުރުން އަޒީމާ ވަނީ އިންޑިއާއިން ރާއްޖެއާ ދެމެދު އޮތް ގުޅުން ކުރިއެރުމަށް ދެމުންގެންދާ އަހަމިއްޔަތުކަން ފާހަގަކުރައްވާފައެވެ.
މިއަހަރަކީ ރައްޖެއާ އިންޑިއާ ގުޅުމަށް 60 އަހަރުފުރޭ އަހަރެވެ. ދުނިޔޭގެ ޤައުމުތަކުގެ ތެރެއިން އަދި ސަރަހައްދުގެ ޤައުމުތަކަށް ބަލާއިރު އިންޑިއާ ހިމެނެނީ ރާއްޖޭގެ މނިވަންކަން ބަލައިގަތް އެންމެ ފުރަތަމަ ޤައުމުގެ ގޮތުގައެވެ.
Advertisement
This content is created and paid for by advertisers and does not involve Voice Journalists
