އިންޑިއާގެ އަސްކަރިއްޔާގެ ގާބިލްކަން އިތުރުކުރުމަށް ކުރަމުންދާ މަސައްކަތުގެ ތެރެއިން، އިތުރު ހަނގުރާމަތީ ޖެޓްތައް ގަތުމަށް ބައިނަލްއަޤްވާމީ ބިޑަށް ވަރަށް އަވަހަށް ހުޅުވާލާނެކަމަށް ދިރާސާކުރާ ފަރާތްތަކުން އަންދާޒާކޮށްފިއެވެ.

އާ ޖެޓްތައް ގަތުމުގެ އަޑު ގަދަވެފައިވަނީ ދާދިފަހުން އިންޑިއާގެ ބެންގަލޫރުގައި ބޭއްވި އެއަރޯ އިންޑިއާ އެއަރޯސްޕޭސް އެގްޒިބިޝަންގެ ހަވާސާއި ކުރެވުނު މަޝްވަރާތަކުގެ ސަބަބުންނާއި، ދާދިފަހުން އިންޑިއާގެ ބޮޑުވަޒީރު މޯދީ އެމެރިކާއަށް ކުރެއްވި ދަތުރުފުޅާވެސް ގުޅިގެންނެވެ. އިންޑިއާގެ އަސްކަރިއްޔާގެ ޖެޓްތަކުގެ 42 ސްކޮޑްރަން އުފެއްދުމުގެ ހުއްދަ އޮތްނަމަވެސް، މިހާރު އެކްޓިވްކޮށް އޮތީ 31 ސްކޮޑްރަންއެވެ. އޭގެ ތެރޭގައި ގިނައީ ރަޝިޔާގައި އުފައްދާފައިވާ ޖެޓްތަކެވެ. ވާދަވެރި ޗައިނާއިން އެގައުމުގެ ވައިގެ އަސްކަރީ ގާބިލްކަން ވަރަށް ބޮޑަށް ކުރިއަށް ޖައްސާލާފައިވާއިރު، ޗައިނާފަދަ ގައުމުތަކުގެ އެހީގައި ޕާކިސްތާނުންވެސް ގެންދަނީ އަސްކަރީ ގާބިލްކަން އިތުރުކުރުމަށް މަސައްކަތްކުރަމުންނެވެ. އެހެންކަމުން އިންޑިއާގެ އަސްކަރިއްޔާގެ ވައިގެ ގާބިލްކަން އިތުރުކުރުމަކީ ކޮންމެހެން ކުރަން ޖެހޭ ކަމެކެވެ.

އިންޑިއާއަށް ޖެޓް ވިއްކަން ޝައުގުވެރި ވެދާނެ ކުންފުނިތަކުގެ ތެރޭގައި އެމެރިކާގެ ލޮކްހީޑް މާޓިން އާއި ބޮއިން، ރަޝިޔާގެ ޔުނައިޓެޑް އެއަރކްރާފް ކޯޕަރޭޝަން، ފްރާންސްގެ ޑަސޯލްޓް އޭވިއޭޝަން އަދި ސްވިޑްންގެ ސާބް އާއި ޖަރުމަންވިލާތުގެ ޔޫރޯފައިޓަރ ހިމެނެއެވެ. ލޮކްހީޑް މާޓިން އިން، އެކުންފުނީގެ އެންމެ މަގްބޫލު އެފް-16 މަރުކާގެ ޖެޓް މޮޑިފައިކޮށް، އިންޑިއާގެ އަސްކަރިއްޔާގެ ބޭނުންތަކަށް އަމާޒުކޮށްގެން އުފައްދާފައިވާ އެފް-21 ވިއްކުމަށް ދަނީ މަސައްކަތްކުރަމުންނެވެ. ލޮކްހީޑުން މިހާރުވެސް އެކުންފުނީގެ އެފް-16 ޖެޓްގެ ފިޔަގަނޑު އުފައްދަނީ ޓާޓާ ކުންފުންޏާއި ގުޅިގެން އިންޑިއާގެ ހައިދަރްއާބާދުގައެވެ. ބިޑް ކާމިޔާބުވެއްޖެނަމަ، އެފް-21 ގެ ފިޔަގަނޑުވެސް އުފައްދާނީ މި ފެސިލިޓީގައެވެ.

Advertisement