ދައުލަތުގެ ހަރަދުތައް ކުޑަކުރަންޖެހޭއިރު، އަދިވެސް ހަރަދުތައް ކުޑަވާތަން ނުފެންނަކަމަށް، ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް މިއަދު ވިދާޅުވެއްޖެއެވެ.
ރައްޔިތުން މަޖިލީހުގެ މާލިއްޔަތު ކޮމިޓީގައި މިއަދު ވާހަކަދައްކަވަމުން ނާޒިމް ވިދާޅުވީ، ދައުލަތުން ކުރަމުންދާ ހަރަދުތައް ކުޑަކުރުމަށް ބައިނަލްއަޤްވާމީ މާލީ އިދާރާތަކުން އެތައް ފަހަރަކު ފާހަގަކުރިނަމަވެސް މިއަދާހަމަޔަށް އާއިއރުވެސް އެކަން އެމަގުން ހިނގަމުންދާތަން ނުފެންނަކަމަށެވެ. ނާޒިމް ވިދާޅުވީ ރާއްޖޭގެ އިޤްތިސާދު ރަނގަޅުވަމުންދާތަން ނުފެންނަކަމަށާއި، އިޤްތިސާދު ރަނގަޅުވަމުންދާ މަންޒަރު ނުފެންނަ ތަނުގައި ހަރަދުތައް ކުޑަކުރާތަންވެސް ނުފެންނަކަމަށެވެ.
އާސަންދައިގެ ހަރަދުތައްވެސް ކަނޑައެޅި މިންގަނޑުން ނައްޓާފައިވާކަން މި ބައްދަލުވުމުގައި ނާޒިމް ވަނީ ފާހަގަކުރައްވާފައެވެ.
އާސަންދައިގެ ހަރަދުތައް މިވަނީ ތިން ބިލިއަނުން ނައްޓާފައި. މިއީ މިދިޔަ އަހަރު ދައުލަތަށް ލިބުނު އާމްދަނީގެ 10 އިންސައްތައާ ގާތްކުރާ އަދަދެއް
ނާޒިމް ވިދާޅުވިއެވެ
ދައުލަތުގެ ހަރަދުތައް އިތުރުވަމުންދާ މިންވަރާ ގުޅޭގޮތުން ނާޒިމް ވިދާޅުވީ އާމްދަނީ ހޯދުމަށް މިދިޔަ އަހަރުކުރެވުނު ހުރިހާކަމަކުންވެސް ލިބުނީ 34 ބިލިއަން ރުފިޔާ ކަމަށާއި، ދައުލަތަށް ލިބެމުން އަންނަ އާމްދަނީ ނިސްބަތުން ދަށަށް ހިނގައްޖެ ކަމަށެވެ. ދައުލަތުގެ އާމްދަނީ ދަށަށްދިޔައިރު، ކަމާބެހޭ މުއައްސަސާއިން އެކަން އެހެން ވާންޖެހުނު ސަބަބު ސާފުކޮށް ބުނެދެވިފަނުވާކަމަށްވެސް ނާޒިމް ވަނީ ފާހަގަކުރައްވާފައެވެ.
ނާޒިމް ވިދާޅުވީ ސަރުކާރުން ޑޮލަރު މާރުކުރުމުގައި އައު އުސޫލެއް ހަދައި ޑޮލަރު މައްސަލައަށް ހައްލެއް ގެނައުމަށް މަސައްކަތްކުރިނަމަވެސް ހަރަދުތައް ކުޑަނުކުރާނަމަ ރަނގަޅުވާނެގޮތެއް އެއީ ހަމަ ނެތްގޮތެއްކަމަށެވެ.
ދައުލަތުގެ ހަރަދުތައް ކުޑަކުރުމުގައި އަދިވެސް ފިޔަވަޅުތަކެއް އެޅެމުން ނުދާކަން މަޖިލީހުގެ ނައިބުރައީސް ނާޒިމް ފާހަގަކުރެއްވިއިރު، އެމްޑީޕީ ސަރުކާރުގެ މާލީ ވަޒީރު އިބްރާހިމް އަމީރުވެސް ވަނީ ރާއްޖޭގެ މާލީހާލަތު ރަނގަޅުކުރާނޭކަމަށް ސަރުކާރުން ވައުދުވިނަމަވެސް، އަދި މިހާތަނަށް އެފަދަ އެއްވެސް ކަމެއް ކުރާތީ ނުފެންނަކަމަ ވިދާޅުވެފައެވެ.
މިދިޔަ އަންގާރަދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އަމީރު ވިދާޅުވެފައިވަނީ، ރައްޔިތުންނަށް ދެމުންދާ ސަބްސިޓީތައް މުރާޖައާކޮށް ސަބްސިޑީ އޭގެ ހައްޤުވެރިންނަށް ދިނުމާއި، ދައުލަތުގެ ބައިތުލްމާލަށް ނުލިބިވާ ފައިސާ ހޯދުމާއި، ސަރުކާރުގެ ހަރަދުތައް ކުޑަކުރުމަކީ މި ސަރުކާރުން ރާއްޖޭގެ މާލީ ހާލަތު ރަނގަޅުކުރުމަށް ވީ ވައުދުތައްކަމަށެވެ. ނަމަވެސް މިއިން އެއްވެސް ކަމެއް ކުރިއަށް ނުދާކަމަށް އަމީރު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
