އިލެކްޓްރޯނިކް އެއަރކްރާފްޓް އުފައްދާ އިންޑިއާގެ ސްޓާޓްއަޕް ކުންފުންޏެއްކަމަށްވާ ދަ އީޕްލޭން ކޮމްޕެނީއިން 788 އެއަރ އެމްބިއުލާންސް ޑެލިވަރކުރުމުގެ ބިލިއަން ޑޮލަރުގެ އެއްބަސްވުމެއްގައި ސޮއިކޮށްފިއެވެ.

ތޮއްޖެހުމުގެ ސަބަބުން އެމްބިއުލާންސްއަކުން ބަލިމީހާއާ ހަމައަށް ގޮސް، އަނބުރާ ހޮސްޕިޓަލަށް ދިޔުމަށް ނަގާ ވަގުތު ބޮޑުތަނުން އިތުރުވެފައިވާ އިންޑިއާގައި މިކަން ވެގެންދާނީ އިންގިލާބީ ބަދަލަކަށެވެ. އީޕްލޭން ކޮމްޕެނީއިން އެއަރ އެމްބިއުލާންސްގެ ޚިދުމަތްދޭ އައި.ސީ.އޭ.ޓީ.ޓީ ކުންފުންޏަށް ވިއްކުމަށް ހަމަޖެހިފައިވަނީ ވަރޓިކަލް ޓޭކް އޯފް އެންޑް ލޭންޑިންގ ގާބިލްކަން ލިބިގެންވާ ޑްރޯން އެއަރކްރާފްޓެވެ. މި މާކެޓްގައި ދި އީޕްލޭން ކޮމްޕެނީއާއި ވާދަކުރަނީ އާރޗަރ އޭވިއޭޝަންއާއި ސަރލާ އޭވިއޭޝަންއެވެ.

ރޮއިޓަރސްއާ ވާހަކަ ދައްކަމުން އީޕްލޭން ކޮމްޕެނީގެ ވެރިޔާ ސަތްޔަ ޗަކްރަވަރްތީ ބުނީ 2026ގެ ފަހުކޮޅު ކޮމަރޝަލް އޮޕަރޭޝަންތައް ފެށޭ ވަރުވާނެކަމަށާއި، ފުރަތަމަ ބާޒާރަށް ނެރެވެނީ އަހަރަކު 100 ޔުނިޓް ކަމަށެވެ. މި އެއަރ އެމްބިއުލާންސްގެ ރޭންޖަކީ 110 ކިލޯމީޓަރެވެ. އެކުންފުނީގެ އަމާޒަކީ އިންޑިއާގެ ހުރިހާ ޑިސްޓްރިކްޓަކަށް މި އެއަރއެމްބިއުލާންސްގެ ޚިދުމަތް ފޯރުކޮށްދިނުމެވެ.

އީޕްލޭން ކޮމްޕެނީއިން މިހާތަނަށް އިންވެސްޓަރުން އަތުން 20 މިލިއަން ޑޮލަރު ހޯދާފައިވެއެވެ.