Muthasim vakivevadaigannavanee, vidhaalhuvee mihaaru dhuvas vejje kamah!

މުއުތަސިމު ވަކިވެވަޑައިގަންނަވަނީ؛ ވިދާޅުވީ މިހާރު ދުވަސްވެއްޖެ ކަމަށް!

17 Feb 2025 | 20:22

އުއްތަމަ ފަނޑިޔާރު މުއުތަސިމް އަދުނާނު

އުއްތަމަ ފަނޑިޔާރު, މުއުތަސިމް އަދުނާނު މަގާމުން ވަކިވެވަޑައިގަންނަވާން ތައްޔާރުވެވަޑައިގަންނަވާ ކަމުގެ އިޝާރާތެއް މިއަދު ދެއްވައިފި އެވެ.

މުއުތަސިމު އެފަދަ އިޝާރާތެއް ދެއްވީ ބައެއް ވަކީލުން ހުވާކުރުމަށް މިއަދު ހަވީރު އޮތް ރަސްމިއްޔާތެއް ޝަރަފުވެރި ކޮށްދެއްވާ ދެއްކެވި ވާހަކަފުޅު ގަ އެވެ. އެމަނިކުފާނު ވިދާޅުވީ މިހާރު "ދުވަސް" ވެއްޖެ ކަމަށެވެ. އަދި މަގާމުގައި ދެން މާގިނަ ދުވަހު ދެމި ނުހުންނަވާނެ ކަމަށް އިޝާރާތަކަށް ފުދޭ ފަދަ މޭރުމަކުން ވިދާޅުވީ މިއަދު މި ބޭއްވޭ ފަދަ ރަސްމިއްޔާތަކުން މިހާރު ހުންނެވި ހައިސިއްޔަތުން ދެން ފެނިވަޑައިނުގެންފާނެ ކަމަށެވެ.

އުއްތަމަ ފަނޑިޔާރުގެ މަގާމުން މުއުތަސިމު ވަކިވެވަޑައިގަންނަވަން ނިންމަަވާފައިވާ ކަމަށް ވާހަކަ ދެކެވޭތާ ދުވަސްކޮޅެއް ވެއްޖެ އެވެ. އެ މަގާމަށް ދެން ވަޑައިގަންނަވާނީ ސުޕްރީމް ކޯޓްގެ ފަނޑިޔާާރު ހުސްނުއްސުއޫދު ކަމަށް ވެސް ވާހަކަ ދެކެވެ އެވެ.

މުއުތަސިމު ވަނީ ކުރީން ވެސް އުއްތަމަ ފަނޑިޔާރު ކަމުގެ މަގާމު ފުރުއްވާފަ އެވެ. އެ މަގާމުގައި ހުންނަވަނިކޮށް މަގާމު ގެއްލިވަޑައިގަތީ ރައީސް ޔާމީންގެ ވެރިކަމުގަ އެވެ. މަގާމު ގެއްލިވަޑައިގަތީ ގާނޫނަށް ގެނައި ބަދަލާ އެކު ސުޕްރީމް ކޯޓްގެ ފަނޑިޔާރުންގެ އަދަދު ހަތަކުން ފަހަކަށް މަދު ކުރަން ނިންމުމުންނެވެ.

ހަބަރު