ހޯމް މިނިސްޓަރު އަލީ އިހުސާންގެ މައްޗަށް ހުށައަޅާފައިވާ އިތުބާރު ނެތް ކަމުގެ މައްސަލައަށް ޖަވާބުދާރީވާން އެއް ގަޑިއިރު ދިނުމަށް އާންމު ކޮމެޓީން މިއަދު ނިންމައިފި އެވެ.

އިހުސާންގެ އިތުބާރު ނެތް ކަމުގެ މައްސަލަ ރައްޔިތުންގެ މަޖިލީހަށް ވެއްދީ އިދިކޮޅު އެމްޑީޕީންނެވެ. އެ މައްސަލާ ގައި އެ ޕާޓީގެ 12 މެންބަރަކު ވަނީ ސޮއިކޮށްފައިވެ އެވެ. މައްސަލަ ހުށައަޅަމުން އެ ޕާޓީން ބުނީ މިނިސްޓަރު އިހުސާނަކީ މަގާމަށް އެކަށީގެންވާ ބޭފުޅެއް ނޫން ކަމަށާ މިދިޔަ މުއްދަތުގެ ތެރޭގައި ވަޒީރަކު ކޮށްގެން ނުވާނެ އެތައް ކަމެއް ކުރައްވާފައިވާ ކަމަށެވެ. އެންމެ ބޮޑު މައްސަލަ އަކަށް ފާހަގަ ކޮށްފައި އޮތީ ހޯމް މިނިސްޓްރީގެ ދަށުގައި އޮތް ޑީއެެންއާރުގެ ތެރޭގައި ސަރުކާރު ހިންގާ މައި ޕާޓީ ޕީއެންސީގެ ފޯމް ފުރި މައްސަލަ އެވެ.

އެމްޑީޕީން ހުށައެޅި މައްސަލައާ ގުޅިގެން އާންމު ކޮމެޓީ އެއްވެ މިއަދު ވަނީ މިނިސްޓަރު އިހުސާންގެ މައްސަލަ ކުރިއަށް ގެންދާނެ ގޮތް ކަނޑައަޅާފަ އެވެ. މައްސަލަ ކުރިއަށް ގެންދަން ކަނޑައެޅީ ދެ ގަޑިއިރުގެ ވަގުތެކެވެ. އޭގެ ތެރެއިން އެއް ގަޑިއިރު ކަނޑައެޅީ ޖަވާބުދާރީވުމަށް މިނިސްޓަރު އިހުސާނަށް ފުރުސަތު ދިނުމެވެ. އަނެއް ގަޑިއިރު އެއީ ބަހުސަށް ހުޅުވާލުމާއި މެންބަރުންގެ ސުވާލުތަކަށް ފުރުސަތު ދިނުމެވެ.

Advertisement

ރައްޔިތުން މަޖިލީސް މިހާރު އެކުލެވިގެންވާ ގޮތަށް ބަލާއިރު، މަޖިލީހުގެ ސުޕަ މެޖީރިޓީއަކީ ސަރުކާރު ހިންގާ ޕީއެންސީއެވެ. އެހެން ކަމުން އިހުސާން މަގާމުން ވަކިކުރުމަކީ އެމްޑީޕީގެ މެންބަރުންނަށް ކުރެވޭނެ ކަމެއް ނޫނެވެ. މިއީ މި ސަރުކާރުގެ ވަޒީރެއްގެ އިތުބާރު ނެތް މައްސަލަ މަޖިލީހަށް ހުށައެޅި ފުރަތަމަ ފަހަރެވެ.